Meta воведува построги правила за тинејџерите на Instagram, Facebook и Messenger

Американскиот технолошки гигант Meta најави нов пакет мерки за поголема заштита на тинејџерите на своите платформи Instagram, Facebook и Messenger, со цел да се намали изложеноста на несоодветна содржина и потенцијално штетни онлајн влијанија.

Компанијата соопшти дека корисниците помлади од 18 години автоматски ќе добијат построги безбедносни поставки, кои ќе го ограничат прикажувањето на содржини што не се соодветни за нивната возраст.

Мерките првично беа воведени во САД, Велика Британија, Австралија и Канада во текот на минатата година, а сега Meta ги проширува на глобално ниво. Новите поставки, познати како „Teen Accounts“, ќе влијаат врз содржините што младите ги гледаат во објавите, кратките видеа, препораките и пребарувањата.

На Facebook дополнително ќе биде ограничена интеракцијата со профили, групи и страници кои редовно објавуваат содржина што може да биде несоодветна за малолетници. Слични ограничувања ќе бидат применети и на Messenger, каде што ќе се намали пристапот до вакви содржини преку линкови, пораки и групни разговори.

Од Meta најавуваат дека подоцна во текот на годината ќе биде воведена и нова функција наречена „Ограничена содржина“, која ќе им овозможи на родителите дополнително да ги контролираат профилите на своите деца и да поставуваат уште построги ограничувања.

Покрај тоа, компанијата тестира нов систем на Instagram кој треба да обезбеди поголема разновидност на содржините што им се прикажуваат на младите корисници. Целта е алгоритмот да не ги оптоварува тинејџерите со постојано повторување на една иста тема.

Според Meta, теми како исхраната, физичката активност или советите за справување со анксиозноста можат да бидат корисни, но не треба да доминираат во препораките и да создаваат еднострана слика за реалноста.

Компанијата исто така ги подобри механизмите за откривање профили кои систематски објавуваат содржини несоодветни за помладата публика. Во рамки на новите мерки, дополнително ќе биде ограничено ширењето видеа што промовираат ризични и опасни интернет-предизвици.

Меѓу содржините што ќе бидат под засилен надзор се и видеата поврзани со опасниот тренд познат како „сурфање на автомобили“, при кој младите се снимаат додека стојат или се движат на покриви и надворешни делови од возила во движење.

Од Meta велат дека новите мерки се дел од пошироките напори за создавање побезбедна дигитална средина за младите, особено во време кога социјалните мрежи имаат сè поголемо влијание врз секојдневниот живот, менталното здравје и навиките на тинејџерите ширум светот.