Microsoft им нуди отпремнини на 60.000 вработени додека вложува милијарди во вештачка интелигенција

Microsoft отвори програма за доброволно заминување со отпремнина за околу 60.000 вработени, што претставува приближно 27 отсто од неговата глобална работна сила. Потегот доаѓа во период на огромни вложувања во вештачка интелигенција и настојувања за контрола на трошоците.

Понудата, објавена во понеделникот, на 26 октомври, опфаќа вработени во одредени тимови во САД, Канада, Индија и Обединетото Кралство. Бројката од 60.000 се однесува на лицата што можат да ја прифатат понудата, а не на веќе потврдени заминувања.

Кои вработени се опфатени?

Програмата е достапна за квалификувани вработени до нивото 70 во внатрешната хиерархија на компанијата. Тоа вклучува генерални менаџери и дел од позициите со титула потпретседател, но не и корпоративните потпретседатели. За разлика од претходната програма за пензионирање, оваа понуда нема услов поврзан со возраста или работниот стаж.

Според извор на „Ројтерс“, меѓу опфатените области се Copilot, финансии, човечки ресурси, Xbox и Windows + Devices. Одредени сектори, вклучувајќи маркетинг, комерцијално работење и безбедност, не учествуваат во програмата.

Раководителката за човечки ресурси Ејми Колман во обраќањето до вработените објасни дека понудата им овозможува поддржан премин на оние што размислуваат за кариера надвор од Microsoft. Истовремено, на тимовите им дава дополнителна можност да се приспособат на променетите деловни потреби.

Пакетот вклучува финансиска поддршка и помош при планирање на следните кариерни чекори. Конкретните услови се доставуваат индивидуално до вработените.

Одлуката треба да ја донесат во декември

Според CNBC, вработените треба да се изјаснат во декември, а оние што ќе ја прифатат понудата ќе ја напуштат компанијата на 31 декември 2026 година.

Microsoft нема објавено целен број заминувања. Компанијата за „Гиквајр“ навела дека очекува помал одзив од приближно 30 отсто, колку што ја прифатиле претходната понуда за доброволно пензионирање.

Реорганизација во година на огромни капитални вложувања

Новата програма следува по пролетната понуда за доброволно пензионирање и по најавеното укинување на 4.800 работни места во јули.

Паралелно, Microsoft прогнозира 175 милијарди долари капитални расходи за календарската 2026 година, во услови на забрзана изградба на центри за податоци и инфраструктура за вештачка интелигенција. Инвеститорите внимателно следат дали приходите од овие технологии ќе ги оправдаат вложувањата, пренесува „Ројтерс“.

Компанијата треба да ги објави следните квартални финансиски резултати во среда, на 28 октомври.