Ване Цветанов ја ангажирал сопругата Дунавка Трифуновска во државната институција со која тој раководи, вели му треба оти само нејзе ѝ верува

Претседателот на државната институција Совет за унапредување и надзор на ревизијата, Ване Цветанов, ја ангажирал својата сопруга, поранешната мис на Македонија, Дунавка Трифуновска, кај него на работа.

Дунавка, која е дипломиран фармацевт, сега работи кај Цветанов, а тој вели дека таа работи без пари. Цеветанов вели дека бил опкружен со голем број непријатели и луѓе од интерес, па морал да вработи човек кому му верува.

„Опкружен сум со многу непријатели и луѓе од интерес, па морав да се потпрам на некого на кого му верувам целосно во овие специфични лицемерни времиња. Сега за сега има потпишано договор на 30 дена. Станува збор за договор за ангажирање надворешен советник за специјални цели. Нема да зема пари. Нејзината плата е нула денари. Зар е чудно некој да работи во интерес на државата за нула денари во состојба кога државата се справува со решавање злосторства во милиони евра од претходната влада? Има некој што мисли и работи во интерес на граѓаните за нула денари“, открива Ване за „Репортер“.

Тој додаде дека ја зел Дунавка и затоа што институцијата што ја води не ја добивала соодветната логистичка поддршка од Министерството за финансии и затоа што бил решен да изгради институција според ЕУ-стандардите.

„Бев принуден за замолам за помош. Дунавка како голем човек и хуманитарец го прифати предизвикот да волонтира и да работи за нула денари. Ако сакате да се уверите во тоа, повелете дојдете за да ве запознам со успесите на институцијата во кои голем дел има и Дунавка. За тоа колку е компетентна можам да ви кажам како менаџер со искуство – како експерт со референции, како архитект на една веќе изградена институција, како и систем за спречување перење пари, оценето со највисоки оценки за прогрес од Советот на Европа“, ни рече Ване Цветанов.

Љ. Владимиров