(ВИДЕО) Знаат ли Американците каде е БиХ? Урнебесни одговори пред дуелот на Светското првенство

Во пресрет на натпреварот меѓу Босна и Херцеговина и Соединетите Американски Држави во шеснаесетфиналето на Светското првенство 2026, новинарите на угледниот спортски медиум The Athletic направија интересен уличен експеримент – ги прашаа случајните минувачи дали можат да ја пронајдат БиХ на слепа карта на Европа.

Репрезентацијата на БиХ, предводена од селекторот Сергеј Барбарез, обезбеди место во нокаут-фазата на Мундијалот, каде ќе се соочи со една од трите земји домаќини – САД. Во двете земји владее голема еуфорија пред натпреварот.

Сепак, анкетата покажа дека географијата не им е силна страна на сите Американци. Дел од испитаниците ја сместија Босна и Херцеговина стотици километри подалеку, дури и во балтичките земји, додека други беа многу блиску до точната локација.

Имаше и учесници кои без двоумење точно ја покажаа БиХ на картата, со што ги демантираа стереотипите дека Американците не знаат каде се наоѓа оваа балканска држава.

Анкетата повторно го актуализираше и старото вирално видео на ABC News, во кое една водителка пред натпревар меѓу САД и БиХ изјави:

„САД ќе игра против Босна и Херцеговина следната среда. Едно знам – не би знаела да ја покажам Босна на карта. Не знам ништо за Босна и не сакам да знам. САД се врати, подобри сме од кога било. Подгответе се, Босно, затоа што ова нема да ви се допадне.“

Нејзината изјава тогаш предизвика бројни реакции на социјалните мрежи и беше оценета како арогантна и непотребна.

Новата анкета на The Athletic, пак, покажа дека иако не сите Американци знаат каде се наоѓа Босна и Херцеговина, има и такви кои без проблем ја пронаоѓаат на европската карта.

Видеото со нивните обиди веќе стана хит на социјалните мрежи, каде корисниците со многу хумор ги коментираат точните и погрешните одговори во пресрет на долгоочекуваниот мундијалски дуел.

ВИДЕОТО ПОГЛЕДНЕТЕ ГО ТУКА