Мет Дејмон во сенка на сопругата: Лусијана привлече внимание во црвено одело на премиерата на „Animals“

Мет Дејмон и неговата сопруга Лусијана се појавија на светската премиера на трилерот „Animals“ во киното „Вествуд Вилиџ“ во Лос Анџелес. Иако актерот е меѓу продуцентите на филмот, на црвениот тепих погледите ги привлече Лусијана со впечатливо црвено одело.

Таа избра сако со широк крој и панталони со висок струк и широки ногавици. Под сакото носеше едноставен бел топ, а комбинацијата ја заокружи со црвени чевли со шпицест врв. Долгата кафеава коса ѝ беше обликувана во меки бранови, додека шминката и накитот ги задржа ненаметливи. Со изборот на една силна боја, Лусијана покажа дека и оделото може да биде подеднакво впечатливо како вечерен фустан на филмска премиера.

Дејмон избра класично темно одело со тенки линии, кошула и вратоврска во кафеави тонови. Двојката позираше заедно пред фотографите на премиерата на новиот филм на Бен Афлек, долгогодишен пријател и соработник на актерот.

Настанот имаше посебно значење и за двајцата сопружници: Мет и Лусијана Дејмон се наведени меѓу продуцентите на „Animals“. Филмот е создаден во соработка со „Artists Equity“, продукциската куќа што ја основаа Дејмон и Афлек.

Првично било планирано главната улога да ја игра Дејмон, но тој се повлекол поради обврските околу „Одисеја“ на Кристофер Нолан. Улогата ја презел Афлек, кој го режира и филмот. Во актерската екипа се и Кери Вашингтон, Џилијан Андерсон и Стивен Јун.

Приказната следи кандидат за градоначалник на Лос Анџелес и неговата сопруга, чиј живот се менува кога нивниот син е киднапиран. Додека се обидуваат да обезбедат пари за откуп, двајцата се соочуваат и со тајни што можат да го разнишаат нивниот брак. „Animals“ пристигнува на „Нетфликс“ на 9 октомври.

Мет и Лусијана Дејмон се во брак од 2005 година. Заедно одгледуваат четири ќерки, а и покрај повремените заеднички појавувања на премиери, семејниот живот главно го држат подалеку од јавноста.