Николоски: Европска поддршка за македонската железница – обезбедени 149 милиони евра за пругата кон Бугарија

Македонија обезбеди 149 милиони евра грант средства преку Инвестициската рамка за Западен Балкан на Европската Унија за изградба на третата делница од железничкиот Коридор 8, на потегот Крива Паланка – Деве Баир.

На денешното потпишување на договорите за грантот, како и договорите за финансирање со Европската инвестициска банка (ЕИБ) и Европската банка за обнова и развој (ЕБОР), вицепремиерот и министер за транспорт Александар Николоски истакна дека проектот е од стратешко значење за државата и регионот.

„Денешното потпишување претставува продолжување на визијата Македонија да ја искористи својата уникатна позиција како раскрсница на Коридорите 8 и 10 и да го докаже своето место како срце на Балканот“, изјави Николоски.

Тој посочи дека изградбата на Коридорот 8 е еден од главните приоритети на Владата и дека по долг период на застој, проектот добива реална финансиска конструкција за реализација.

„Ова е исклучително значаен ден, затоа што по скоро две години работа доаѓаме до проект што може да биде реализиран“, рече Николоски.

Министерот информираше дека е постигнат договор и со Бугарија за изградба на прекуграничниот железнички тунел кој треба да ги поврзе двете држави.

„Очекуваме наскоро да се обезбеди дополнителна поддршка од Европската Унија, ЕИБ и ЕБОР за изградбата на тунелот. Овој проект покажува како можат да се решаваат проблемите од минатото и инфраструктурата да се стави на вистинските шини“, додаде Николоски.

Со реализацијата на железничката делница Крива Паланка – Деве Баир, Македонија ќе добие подобра поврзаност со Бугарија и пристап до европските транспортни коридори, што се очекува да придонесе за развој на економијата, полесен транспорт на стоки и поголема регионална интеграција.