Нови столчиња на „Гоце Делчев“: Проданоски најавува продолжување на соработката за уредување на стадионот

На малата трибина на Градскиот стадион „Гоце Делчев“ во Прилеп се поставени нови столчиња со поддршка од Фудбалската федерација на Македонија, соопшти градоначалникот Дејан Проданоски. Зафатот обезбедува подобри услови за публиката и за навивачите на ГФК „Победа“.

Проданоски упати благодарност до претседателот на ФФМ, Масар Омерагиќ, и потпретседателот Марјан Стојкоски за поддршката, изразувајќи очекување дека соработката ќе продолжи и во следниот период.

„Ваквата соработка очекувам да продолжи и во иднина, со цел комплетирање на целиот стадион и лик каков што заслужува нашиот фудбалски храм“, порача градоначалникот.

Тој истакна дека подобрувањето на условите на стадионот е дел од пошироките активности за унапредување на спортската инфраструктура во Прилеп. Паралелно, според него, се работи на изградба на детски игралишта и уредување простори за спорт, рекреација и забава, со посебно внимание на најмладите.

„Инвестираме во спортска инфраструктура, ги поддржуваме спортските клубови и создаваме подобри услови за новите генерации“, истакна Проданоски.