Поранешната најблиска соработничка на Меланија Трамп почнува ново поглавје: „Не сакам да бидам запаметена по политиката“

Стефани Винстон Волкоф, поранешната најблиска советничка на Меланија Трамп, вели дека сака целосно да ја остави политиката зад себе и да се посвети на телевизиската продукција.

Во интервју за Page Six, Волкоф истакна дека периодот поминат покрај поранешната прва дама бил само едно поглавје од нејзиниот живот.

„Меланија беше едно поглавје од мојот живот. Тоа не е мојата приказна“, изјави Волкоф, која претходно објави мемоари за своето пријателство со Меланија Трамп и нивниот подоцнежен конфликт.

Нејзиниот нов професионален фокус е телевизиската продукција. Откако неодамна го продуцираше проектот „Gunslingers“, сега е извршен продуцент на новата телевизиска серија „The Trouble with Billy“.

Серијата е инспирирана од животната приказна на актерот Вилијам Мекнамара, некогашна холивудска ѕвезда од 90-тите години, кој на врвот од кариерата изгубил речиси сè поради зависност од алкохол и дрога. Во проектот учествуваат и актерите Били Болдвин и братот на Волкоф, Рендал Батинкоф, кој ја вклучил во продукцијата.

„Знам што значи повторно да го изградиш животот по најтешкиот период. Никој не треба да биде дефиниран од еден единствен момент“, изјави таа.

Пред да влезе во Белата куќа како советничка на Меланија Трамп, Волкоф беше долгогодишна модна консултантка и блиска пријателка на семејството Трамп. Нејзиниот ангажман заврши по контроверзиите околу организацијата на првата претседателска инаугурација на Доналд Трамп, кога беше објавено дека нејзината компанија добила околу 26 милиони долари за организација на настанот.

Волкоф тогаш тврдеше дека била „жртвено јагне“ и дека лично добила само мал дел од тие средства.

Во изминатите денови таа активно ја промовира новата серија во Њујорк. Заедно со Вилијам Мекнамара беше забележана на настани, меѓу кои и во салонот на Елиут Ривера, каде се сретна со Хиларија Болдвин.

Минатата недела присуствуваше и на заедничка прослава организирана со Ноел Ешман по повод неговиот роденден и премиерата на серијата.

„Не сакам луѓето да ме поврзуваат со политиката или со предавството. Сакам да раскажувам приказни кои потсетуваат дека зад секој наслов стои човек и дека секој заслужува втора шанса“, порача Волкоф.