После девет години, Мета повторно ќе ги спои Месинџер и Фејсбук

По отсуство од речиси девет години, Мета повторно ќе ги обедини Месинџер и мобилната апликација Фејсбук.

„Ја тестираме можноста луѓето да пристапат до дојдовното сандаче на Месинџер во рамките на апликацијата Фејсбук и наскоро ќе го прошириме тоа тестирање“, се вели во официјалното соопштение на Фејсбук.

Нагласено е дека желбата на платформата е ова да биде лесен и корисен начин за поврзување и споделување на содржини на корисниците, било во рамките на апликацијата Месинџер или директно во рамките на Фејсбук.

Кога Мета го отстрани Месинџер од апликацијата Фејсбук во 2014 година, забележа дека целта е да се фокусира развојот на Месинџер да го направи најдоброто можно искуство за пораки и да се избегне забуна со различните искуства на Фејсбук за испраќање пораки преку мобилни телефони.

Во обид да биде поконкурентен со Тик ток, Мета го префрла фокусот на Фејсбук од апликација која ги поврзува корисниците со пријателите и семејството на платформа која е повеќе фокусирана на откривање содржина и забава.

Клучната причина зошто Мета ги враќа пораките во апликацијата Фејсбук е да им олесни на луѓето да го споделат она што го откриваат на Фејсбук преку пораки, кога, каде и како одговара на нивните потреби, без да мора да се префрлат на друга апликација, се вели во соопштението на компанијата.