Претставничката на Србија прошета во костим со орлови крилја на „Мис Универзум“

Започна 73-от избор за „Мис Универзум“. Во прелиминарниот дел од натпреварот сите девојки прошетаа во народни носии, а внимание привлече претставничката на Србија, Ивана Тришиќ.

Таа одеше во костим со орлови крилја и голема круна на главата. На социјалните мрежи се проширија снимки од прелиминарното натпреварување, а на официјалниот канал „Мис Универзум“ Србија објаснија како дошле до идејата за костимот.

„Националната носија на Србија ја црпи својата инспирација од моќната симболика на грбот на земјата. Во неговото срце, величествениот бел двоглав орел гордо се издигнува против темноцрвениот штит, претставувајќи ја силата, единството и нескротливиот дух на нашата нација. Крунисан со кралска круна, овој симбол на суверенитет е доказ за издржливоста, историјата и длабоко вкоренетите традиции.

Отелотворувајќи ја елеганцијата и значењето, овој костим го отсликува трајниот дух на Србија, нејзиното безвременско наследство и гордоста на народот што опстојува низ вековите. Ивана Тришиќ носејќи го, ја носи силата на Србија, почитувајќи го нашето минато и истовремено прифаќајќи ја нашата иднина“, напишаа тие.

Пред титулата Мис Универзум Србија, Ивана ја носеше титулата Мис на Србија за 2017 година. Тришиќ има диплома по право, а истакнува дека сака да се бори против гладот ​​во светот.