Принцот Хари и Меган Маркл може да ја откажат посетата на Велика Британија: “Без државно обезбедување нема да патуваат со децата”

Принцот Хари и Меган Маркл би можеле да ја откажат планираната посета на Велика Британија следниот месец, откако повторно им било одбиено барањето за обезбедување финансирано од британските даночни обврзници.

Според „The Guardian“, двојката планирала заедно со своите деца – седумгодишниот принц Арчи и петгодишната принцеза Лилибет – да отпатува во Англија за да се сретне со членовите на семејството, пријателите и да посети повеќе хуманитарни организации кои му се особено важни на војводата од Сасекс.

„Нивните планови за средби со семејството, пријателите и посетите на добротворните организации беа урнати во последен момент“, изјавил извор за британскиот весник.

Според истиот извор, Хари сè уште разгледува различни можности како безбедно да ги донесе Меган и децата во Велика Британија.

„Ако најде начин тоа да го направи безбедно, ќе го направи“, наведува изворот.

Една од главните причини за загриженоста на принцот Хари е безбедноста на неговите деца. Тој, наводно, не сака Арчи и Лилибет да бидат изложени на папараци уште од моментот кога ќе слетаат во Велика Британија.

„Нема да дозволи неговите деца да поминуваат низ такво искуство“, тврди изворот.

Американските медиуми наведуваат дека семејството сакало да отпатува во Англија и за децата повторно да се сретнат со нивниот дедо, кралот Чарлс Трети, кој се лекува од рак.

Во меѓувреме, „Daily Mail“ објави дека канцеларијата на војводата и војвотката од Сасекс испратила оперативна белешка во која било наведено дека семејството ќе престојува во официјална кралска резиденција. Сепак, според медиумот, таа одлука била повлечена само 24 часа подоцна.

Од Бакингемската палата и од канцеларијата на Хари и Меган засега нема официјален коментар за информациите.

Според „Page Six“, двојката, која годишно троши околу три милиони долари за приватно обезбедување, планирала да патува со сопствен тим за безбедност. Сепак, тие барале 24-часовна вооружена заштита, а наводно им било одобрено само приватно обезбедување додека престојуваат во кралската резиденција.

Принцот Хари го загуби правото на државно финансирано обезбедување во 2020 година, кога тој и Меган Маркл се повлекоа од кралските должности. Оттогаш, војводата од Сасекс неколкупати ја оспоруваше таа одлука, но досега без успех.

Поради тоа, Хари веќе подолго време избегнува да патува во Велика Британија заедно со своето семејство, бидејќи смета дека без соодветно обезбедување нивната безбедност не може да биде гарантирана.