Принцот Џорџ речиси ја достигна Кејт Мидлтон по висина: Ретко заедничко појавување на мајката и синот го привлече вниманието

Принцот Џорџ расте со неверојатна брзина. Најстариот син на принцот Вилијам и принцезата Кејт Мидлтон повторно се најде во центарот на вниманието, откако се појави во ретко заедничко видео со својата мајка, при што многумина забележаа дека 12-годишниот принц веќе речиси е висок колку неа.

Принцот и принцезата од Велс на својот официјален Инстаграм профил објавија видео од посетата на Battle of Britain Memorial Flight во базата на Кралските воздухопловни сили (RAF) во Коннгсби, по повод Денот на вооружените сили на Велика Британија.

Во видеото се гледа како Џорџ и Кејт одделно седнуваат во кабините на историски воени авиони, разговараат со пилотите и инженерите и се запознаваат со богатата историја на британската авијација.

„Оддаваме почит на службата и жртвата. Имавме можност да ја запознаеме извонредната историја на овие авиони и луѓето кои ја чуваат нивната традиција. Тоа е моќен потсетник на храброста, вештината и посветеноста на сите што служеле и продолжуваат да служат“, стои во објавата на кралската двојка.

Покрај посетата, јавноста повторно зборува и за иднината на младиот принц. Според најавите од Кенсингтонската палата, Џорџ од септември ќе започне да посетува Eton College, едно од најпрестижните машки интернати во Велика Британија.

Со тоа тој ќе ги следи стапките на својот татко, принцот Вилијам, кој се школувал во Итон од 1995 до 2000 година, како и на својот чичко, принцот Хари, кој матурирал таму во 2003 година.

Принцот Џорџ, кој следниот месец ќе наполни 13 години, досега посетуваше Lambrook School заедно со своите помлади брат и сестра – принцезата Шарлот и принцот Луис.

Итон колеџ, основан уште во 1440 година, е најголемиот машки интернат во Англија и низ неговите училници поминале бројни значајни личности, меѓу кои и повеќе од 20 британски премиери, вклучувајќи ги Дејвид Камерон и Борис Џонсон.

Новото појавување на Џорџ повторно покажа колку брзо расте идниот британски крал, а неговата висина и зрел изглед предизвикаа бројни реакции на социјалните мрежи.