Пристигна тизерот за „Верити“: Страст, тајни и психолошка игра до граница на лудило

Објавен е првиот тизер за долгоочекуваниот психолошки трилер „Верити“, кој веќе предизвикува огромно внимание кај публиката. Филмот, во кој главните улоги ги толкуваат Ен Хатавеј и Дакота Џонсон, ќе пристигне во кината во октомври и се најавува како еден од најголемите хитови на крајот од годината.

Станува збор за филмска адаптација на истоимениот бестселер на Колин Хувер од 2018 година, кој важи за едно од највознемирувачките дела во современата популарна литература. Приказната го следи животот на пропаднатата писателка Лоуен Ешли, која ја игра Дакота Џонсон, а која добива неочекувана понуда што ќе ѝ го промени животот.

Таа е ангажирана од Џереми Крафорд, сопругот на познатата авторка Верити Крафорд, која поради мистериозни околности не може да продолжи да пишува. За да ја заврши серијата книги, Лоуен се преселува во изолираниот дом на семејството, но таму открива нешто што ќе ја вовлече во мрачна и опасна игра.

Во куќата, Лоуен наоѓа ракопис што изгледа како автобиографија на Верити, исполнет со шокантни и изопачени признанија. Со секоја прочитана страница, границата меѓу вистината и манипулацијата станува сè понејасна, а опасноста околу неа расте.

Тизерот започнува со морничава сцена во која Лоуен ја набљудува Верити додека спие, по што следува серија на напнати и провокативни моменти. Еден од највпечатливите кадри е кога по страстен бакнеж со Џереми, Лоуен одеднаш ја гледа Верити на негово место, која ја каснува за усна – момент што дополнително ја засилува психолошката напнатост.

Режисер на филмот е Мајкл Шоуолтер, кој повторно соработува со Ен Хатавеј по нивниот претходен проект, додека сценариото е адаптација на Ник Антоска. Покрај главната актерска екипа, во филмот се појавуваат и Брејди Вагнер, Асел Свонго и Даниел Ечеварија.

Премиерата на „Верити“ е закажана за 2 октомври, а судејќи според првите реакции и атмосферата во тизерот, публиката ја очекува интензивно и вознемирувачко филмско искуство кое долго ќе се памети.

Тизерот за Верити погледнете го тука