Третоодделенката Нина Неделковска од Карпош доби покана да тренира сноуборд во Австрија

Пред само две години малкумина знаеја дека во Македонија расте мала, но бестрашна сноубордерка. Денес, осумгодишната Нина Неделковска веќе е име што се спомнува со восхит на снежните патеки во регионот. Малечка на години, но голема во духот – таа со храброст, труд и истрајност покажува дека кога желбата е доволно силна, детскиот сон може да стане реалност.

Нина е ученичка во трето одделение во ОУ „Војдан Чернодрински“ во Карпош и на шест години првпат застана на сноуборд. Нејзиниот талент прв го препозна легендарниот, сега веќе починат тренер, Дане Гегој, кој ја прифати да тренира и покрај тоа што беше најмлада. Токму тој ја насочи кон професионалниот спортски пат и ја научи дека успехот не доаѓа преку ноќ – туку преку љубов, посветеност и многу падови што ја прават посилна.

Како член на српскиот клуб „ММ ски“, Нина во изминатите две сезони (2023/2024 и 2024/2025) редеше медали во повеќе дисциплини – BA, SS, SL и GS и се закити со титулата најмлад државен првак на Република Србија.
Со своите настапи на натпревари таа успеа да се издвои меѓу конкурентите постари од неа и да покаже дека иднината на сноубордот во регионот има ново лице.

Нејзините зимски тренинзи се одвиваат на Копаоник под будното око на селекторот Филип Филиповиќ, а летните подготовки најчесто се одвиваат на глечери или во хали со вештачки снег.

Семејството е нејзина најголема поддршка – секој тренинг, секое патување и секој натпревар се заедничка победа.

Оваа година нејзината приказна добива ново возбудливо поглавје. Нина е поканета да тренира во Австрија во рамките на престижната програма NASH (Next Austrian Snowboard Hero) – можност што ја добиваат само најперспективните млади сноубордери во Европа. Таму ќе тренира со врвни тренери и ќе има шанса да ги усоврши техниките што ја одвојуваат од своите врсници.

Со срце полно со љубов кон спортот, со насмевка и став на вистински борец, Нина веќе ја инспирира својата генерација. Таа е доказ дека возраста не е пречка за големи соништа и дека македонските деца може да блеснат и на меѓународната сцена – ако веруваат, работат и не се откажуваат.