Хари Стајлс пред најголемиот предизвик во кариерата: 67 концерти, исцрпувачки тренинзи и рекордни 30 вечери во Њујорк

Хари Стајлс е среде една од физички најнапорните турнеи во својата кариера, а откажувањето на концерт во Бразил поради здравствени проблеми повторно го отвори прашањето – колку долго може да се издржи вакво темпо?

32-годишниот британски пејач моментално ја одржува светската турнеја „Together, Together“, која опфаќа дури 67 концерти. Во вторникот тој морал да го откаже настапот во Бразил поради, како што било наведено, болест поврзана со турнејата. Не било прецизирано дали самиот Стајлс или некој од неговиот тим од околу 200 луѓе се разболел.

Сепак, веќе во петокот Стајлс повторно излегол пред илјадници обожаватели на стадионот „MorumBIS“ во Сао Паоло.

Следуваат неверојатни 30 концерти во „Медисон Сквер Гарден“

Најголемиот тест допрва доаѓа. На 26 август Стајлс треба да започне резиденција од дури 30 вечери во „Медисон Сквер Гарден“ во Њујорк, каде како поддршка е најавен Jamie xx.

Интересот е огромен. Според Ticketmaster, околу 11,5 милиони луѓе се обиделе да дојдат до билети, иако арената може да прими приближно 18.000 посетители по вечер.

Турнејата ја води Live Nation, а претставник на промотерот нагласил дека конечните одлуки за распоредот ги носи самиот артист.

„Хари знаеше на што се согласува. Тој ја користи целата арена и постојано трча наоколу“, било наведено.

Според проценките на обожавателите кои ги следат неговите настапи, Стајлс за време на еден концерт може да истрча меѓу две и три милји, односно приближно три до пет километри.

Загриженост по настапот на „Вембли“

Пред актуелниот дел од турнејата, Стајлс одржа рекордни 12 концерти на стадионот „Вембли“ во Лондон. Тој доби и признание од Гинисовата книга на рекорди за најдолга музичка резиденција на „Вембли“ во рамките на една серија настапи.

Во тој период бил забележан како трча околу шест милји од својот дом до стадионот.

За време на еден од јунските концерти, одржан во период на големи горештини, Стајлс ги загрижил фановите кога по пиење вода почнал силно да кашла и паднал на сцената. Сепак, настапите продолжиле.

Извор близок до пејачот за Page Six ја опишал турнејата како исклучително напорна, но додал дека Стајлс ужива во настапите и свесно го прифатил предизвикот.

Според друг музички промотер, ваквиот распоред неизбежно остава последици бидејќи концертите претставуваат физички исклучително барана работа.

Маратонец кој сериозно се подготвува за сцената

Стајлс одамна не го третира настапувањето само како музичка подготовка. Со него често патува неговиот тренер за сила и кондиција Бред Гулд, а претходно работел и со поранешниот припадник на специјалните сили Тибо Давид.

Давид го подготвувал и за претходната „Love on Tour“, која траеше од септември 2021 до јули 2023 година.

Според тренерот, целта била Стајлс да изгради издржливост, да го намали ризикот од повреди и да може да го задржи високото ниво на енергија во текот на целиот концерт.

Тренинзите вклучувале трчање, бокс, вежби во различни спортски сали, па дури и трчање по скалите на концертните арени.

Стајлс во меѓувреме стана и сериозен маратонец. Ги завршил маратоните во Токио и Берлин, а на Берлинскиот маратон во септември 2025 година забележал време од 2 часа, 59 минути и 13 секунди.

Според Давид, Стајлс во тренинг може да истрча една милја за 5 минути и 13 секунди.

Трчањето му станало начин за справување со славата

Физичката активност за пејачот не е важна само поради концертите. Стајлс претходно зборуваше дека долгите трчања му помагаат да се справува со психолошкиот притисок што го носи огромната популарност.

Во интервју за Runner’s World тој го опиша трчањето како своевиден разговор со самиот себе.

Признал и дека во одреден период славата го натерала да се повлече од нормалниот секојдневен живот. Често одбивал родендени, патувања и други покани поради работните обврски, а за време на турнеите понекогаш се прашувал што навистина им дава на луѓето наспроти огромното внимание и енергија што ги добива од публиката.

Неговите тренери велат дека покрај физичката кондиција, големо внимание им посветува на сонот, хидратацијата, избалансираната исхрана и управувањето со стресот.

Новиот албум веднаш стигна на врвот

Турнејата го промовира четвртиот студиски албум на Стајлс, „Kiss All the Time. Disco, Occasionally“, кој во март дебитираше на првото место на Billboard 200 со 430.000 еквивалентни албумски единици.

Тоа е нешто послаб американски старт од претходниот „Harry’s House“, кој во мај 2022 година дебитираше со 521.500 единици.

„Harry’s House“ го донесе мегахитот „As It Was“, кој 15 недели беше на врвот на Billboard Hot 100, а албумот во 2023 година ја освои и наградата Греми за албум на годината.

Според пријател на Стајлс, новиот албум глобално надминал еден милион продадени еквивалентни единици во првата недела и бил создаден токму со настапите во живо на ум.

По две и пол години пауза повторно избра огромна турнеја

По завршувањето на „Love on Tour“, Стајлс направи пауза од приближно две и пол години. Голем дел од времето го поминал во Италија и, според текстот на Page Six, во тој период ја започнал врската со актерката Зои Кравиц, која медиумот ја наведува како негова свршеница.

Кравиц била забележана меѓу публиката и на неговите последни концерти на „Вембли“.

Стајлс претходно признал дека на почетокот самата идеја да направи подолга пауза му изгледала речиси незамисливо. За време на престојот во Италија повторно почнал да ги открива едноставните нешта од секојдневниот живот – како мирно кафе или оброк со пријателите без постојана брзање.

Њујорк би можел да му донесе постабилен ритам

И покрај огромниот број концерти во „Медисон Сквер Гарден“, извори очекуваат престојот во Њујорк да му овозможи барем поголема стабилност бидејќи нема постојано да патува од град во град.

Според Page Six, тој ќе може да престојува кај Кравиц во Вилијамсбург, Бруклин. Стајлс и претходно бил забележуван како пеш или со трчање го минува Вилијамсбург мостот на пат кон Менхетен.

Во приватниот живот, според извори на медиумот, Стајлс и Кравиц размислуваат и за семејство, иако засега има малку конкретни информации за нивните планови за брак.

Кравиц неодамна зборуваше и за мајчинството, посочувајќи дека е свесна оти ќе мора внимателно да одлучи каде ќе ја насочи својата енергија и дека тешко би можела истовремено целосно да му се посвети на дете и на режирање филмови.

Светската турнеја на Стајлс треба да заврши во Австралија во декември. И покрај физичкиот напор, здравствените предизвици и исклучително густиот распоред, луѓето од неговото опкружување велат дека токму на сцената се чувствува најисполнето.

„Тој ќе биде артист до крајот на својот живот“, изјавил негов пријател.