Хит претставата „Спонзоруша и будала”на 5 април во Скопје – Љубов, пари и моќ на сцена

На 5 април 2026 година, сцената на Македонската опера и балет ќе биде домаќин на еден од најинтригантните и најкоментирани театарски проекти во регионот, претставата „Спонзоруша и будала“, по текст на Вања Булиќ, во адаптација и режија на Раде Вукотиќ.

Станува збор за интелигентна, провокативна и слоевита театарска комедија која под површината на хуморот отвора прашања што силно одекнуваат во современото општество – љубовта и интересот, моќта и манипулацијата, парите и емоциите, вистинските и лажните вредности.

„Спонзоруша и будала“ не е само приказна за односот меѓу маж и жена, туку огледало на времето во кое живееме, време во кое статусот често е поважен од суштината, а амбицијата знае да ја надмине искреноста. Низ динамичен дијалог, силни карактери и впечатливи сцени, претставата поставува прашања кои публиката долго ќе ги анализира и по спуштањето на завесата.

Дејството следи двајца протагонисти, млада девојка која доаѓа од внатрешноста во големиот град во потрага по „светла иднина“ и маж од маргините на општеството, снаодлив, но морално нестабилен лик кој се обидува до пари и статус да дојде по краток пат. Нивните патишта се вкрстуваат во низа комични, но и горко реални ситуации.

На сцената ќе настапат докажаните и омилени актери од регионот, Исидора Граѓанин, Саша Јоксимовиќ и Саша Пантиќ, кои со својата интерпретација носат емоционална длабочина, суптилна иронија и драматичен набој што ја прави оваа претстава исклучително силна.

Текстот на Вања Булиќ, познат по својата директност и општествена ангажираност, добива нов театарски слој преку режисерскиот пристап на Раде Вукотиќ, кој внимателно ја гради тензијата помеѓу комедијата и драмата, создавајќи продукција што истовремено забавува и предизвикува.

„Спонзоруша и будала“ е претстава која не нуди едноставни одговори. Таа поставува прашања. Провоцира. Разоткрива. И најважно, ја вклучува публиката во разговор за вредностите, изборите и лицата што ги носиме во секојдневието.

Во време кога успехот се мери со лајкови, а моралниот компас често е потиснат од амбицијата, оваа претстава поставува едноставно прашање, постои ли полесен пат и колку навистина чини тој?

Настанот ќе се одржи на 5 април 2026 година во Македонската опера и балет во Скопје, простор кој со својата елеганција и сценска инфраструктура ќе овозможи вистинско театарско доживување на високо продукциско ниво, истакнува организаторот.