Денеска и утре состаноци на мешовитата комисија со Бугарија, ќе се разговара за Гоце Делчев

Учебниците за седмо одделение и прашањето за ликот и делото на Гоце Делчев се очекува да бидат ставени „на маса“, на состаноците на мешовитата историска комисија за историски и образовни прашања помеѓу Северна Македонија и Бугарија.

Средбите ќе се одржат онлајн денеска и утре.

Членовите на комисијата претходно се состанаа за да разговараат за содржините во македонските учебници по историја за средновековниот период и раноосманлискиот периоди и образовни прашања. Како што информираа копретседателите на комисиите по завршувањето на тој состанок, малку било разговарано за Гоце Делчев и немало никакво поместување во однос на дебатата за заедничко чествување на неговиот лик и дело.

Говорејќи за средбите на комисиите, бугарската министерка за надворешни работи, Екатерина Захариева, утрово оцени дека засега не е постигнат значителен напредок.