Двајца Кавадарчани добија грантови од 20.000 евра за семејни винарии

Директорот на Агенцијата за финансиска поддршка во земјоделството и руралниот развој, Никица Бачовски, денеска во Кавадарци, врачи две од вкупно 27 одобрени апликации во Тиквешкиот регион за инвестиции во агро секторот преку „Мерката 113 Поддршка за поттикнување на земјоделско производство“.

Апликантите кои денеска ги добија договорите имаат одобрено неповратен грант до 20 илјади евра за набавка на опрема за семејни винарии.

„Имено, со овие средства, апликантите ќе набават пневматски преси, иноксни садови, мелачки за грозје, разладни уреди, пумпи и опрема за флаширање. Модернизирањето на производството на овие млади луѓе е најголем доказ дека нашите мерки даваат резултат, а граѓаните ја препознаваат шансата која им ја дава Владата за поддршка на младинското претприемништво. Петре и Блаже, преку своите семејни винарии ќе овозможат, домашното производство на грозје да се преработи во нивни сопствени капацитети и да се произведе сопствено вино, како нов бренд во широката македонска винска лепеза“, истакна Бачовски.

Бачовски додаде дека преку Мерките кои се реализираат преку Агецијата за финансиска поддршка во земјоделството и руралниот развој, се создаваат нови работни места, нови брендови кои позитивно ќе се одразат на домашната еконимија. Со „мерката 113 Поддршка за поттикнување на земјоделско производство“ се опфатени 265 апликанти на возраст до 40 години, за кои се одвоени 3.1 милион евра за инвестиции во преработка и маркетинг на земјоделски производи.

Агенцијата за финансиска поддршка во земјоделството и руралниот развој продолжува со засилена имплементација на мерки и програми за доделување на финансиска помош како главен двигател на развојот и модернизацијата на агро секторот.