Грчкиот министер за туризам повикува на летување: Сега и засекогаш сè што сакате е Грција

Грчкиот министер за туризам Харис Теохарис покани луѓе од целиот свет да го поминат својот летен одмор во Грција, истакнувајќи го слоганот „Сè што сакате е Грција“.

„Сега и засекогаш единственото нешто што го сакате е Грција. Да ја вратите насмевката на вашите усни со надеж дека ќе си ги вратите животите, единственото нешто што го сакате е Грција”, рече Теохарис во обраќањето на меѓународниот саем за патувања ИТБ Берлин 2021, кој се одвива онлајн.

Тој рече дека Грција се надева, доколку епидемиолошките услови дозволат, дека ќе ги отвори вратите за туризам до 14 мај.

Дотогаш, како што објасни, ќе биде испитано пилот-отворањето, веројатно на почетокот на април, со земјите на ЕУ и земјите кои отидоа напред во вакцинацијата, како што е Израел.

Обраќајќи им се на потенцијалните посетители, Теохарис истакна дека Грција е подготвена да ги пречека со сеопфатен протокол за летото 2021 година, под услов да исполнуваат еден од трите услови: или да се вакцинирани или да имаат антитела или негативен тест за Ковид-19.