Австрија продолжува да вакцинира со „Астразенека“, САД очекуваат уште половина милион дози

Иако многу земји од ЕУ одлучија да престанат да имунизираат со вакцината на „Астразенека“, Австрискиот национален совет за вакцинација препорачува понатамошна употреба на оваа вакцина.

Националниот совет за вакцинација, покрај привремената препорака за продолжување на употребата на вакцината на „Астразенека“, посочува дека има недостаток на податоци за донесување на конечна одлука. Австрија е критична кон одлуките на некои земји членки на ЕУ за прекинување на употребата на „Астразенека“.

Во врска со ова, министерот за здравство, Рудолф Аншобер, побара што е можно поскоро став на надлежните европски органи за заедничко европско дејствување.

„За време на вакцинацијата, се договоривме за заедничка европска акција. Затоа националната солидарност не е ефикасна, ниту придонесува за создавање доверба“, нагласи Аншобер.

Тој рече дека ваквите далекусежни одлуки мора да се донесат врз основа на јасни факти, и во моментов нема докази за поврзаност помеѓу здравствените инциденти и вакцината на „Астразенека“.

„Астразенека“ денес објави дека се согласила да им испорача на САД до половина милион дополнителни дози од своето експериментално комбинирано лекување против Ковид-19 на база на антитела во вредност од 205 милиони долари, пренесува „Ројтерс“.

Британскиот производител на лекови и американски владини агенции првично се согласија да испорачаат 200.000 дози, а оваа нова количина го зголемува вкупниот обем на работа со САД на 700.000 дози во вредност од 726 милиони долари.

„Астразенека“ соопшти дека нивниот третман против Ковид-19, AZD7442, сè уште не е одобрен за употреба во САД и дека новиот договор зависи од одобрувањето на американската Администрација за храна и лекови.