Во Реал стравуваат дека уморниот Зидан е подготвен да си замине

Во соблекувалната на Реал Мадрид стравуваат дека Зинедин Зидан нема да биде на чело на тимот следната сезона, бидејќи Французинот е подготвен да си замине пред последната година од неговиот договор, тврди порталот „Goal“.

Според нивните информации од шпанската престолнина, консензусот е дека времето на Зидан е при крај и дека Зидан е уморен од работите кои не се под негова контрола. По недостатокот на трансфери во текот на летото, тука беа и низата повреди, бурниот календар, фијаското со Европската Суперлига, и редовните критики кои ги добиваше тој.

По разочарувачката елиминација од Челси во Лигата на шампоните, се верува дека Зидан веќе не може да смета и на поддршката на големите имиња во клубот, од кои на пример Марсело и Иско се разочарани од маргинализацијата.

Претседателот Флорентино Перез се надева дека ќе го убеди Зидан да остане барем уште 12 месеци, но најверојатно ова зависи од засилувањата кои Реал ќе успее да ги донесе во текот на летото, со Килијан Мбапе од Пари Сен-Жермен како прва цел на Зидан подолго време.

Кој би можел да го замени? Една опција е легендата Раул, кој сега е тренер на Б-тимот на Кастилја, од каде што пристигна и самиот Зидан. Друга опција е Јоаким Лев, кој си заминува од германската репрезентација по ЕП, како и Масимилјано Алегри, кој подолго време е без работа.