(Видео) Се уште се активни осум пожари, останатите се делумно изгаснати

Во земјава до 16 часот се уште активни се осум пожари, а останатите се делумно локализирани. Авионот на романското воено воздухопловство во два налети дејствуваше на пожарот во Општина Прилеп кај селата Топлица, Ракле и Никодин, што е делумно локализиран, но на одредени места се уште има чадење. На терен се екипи на Армијата и ШС Црн Бор од Прилеп, информира помошникот раководител на Центарот за управување со кризи, Марија Милкова на попладневната прес-конференција во ЦУК.

„ Пожарот во Делчевскиот регион во село Разловци и село Нов Истевник е ставен под контрола, а има мало чадење во местото викано Грбовец, но пожарот е под контрола. На терен се екипи од пожарната, странската помош, МВР и Армијата. Пожарот во Пехчево во село Будинарци се уште е активен. Имаше моменти кога се надевавме дека пожарот е локализиран, но се појавија нови жаришта. На терен се припадници од Армијата, МВР, ШС Малеш, ШС од Струмица, противпожарни бригади од Скопје, Кавадарци и Штип, вработени од ДЗС, ЕВН, месно население, меѓународни тимови од Словенија и Австрија и други субјекти кои се справуваат со огнената стихија“ соопшти Милкова.

Таа додаде дека активен пожар има и во Општина Сарај во селата Раовиќ и Буковиќ, каде на терен има екипи од Националниот парк Јасен, ШС Караџица, ПП бригада на Град Скопје и жители од општината.

„ Активен е и пожарот во Општина Петровец со селото Дивје на месноста викана Крушје, кој беше ставен под контрола, но во 13:30 часот повторно изгуби контрола. На терен се претставници од ШС Караџица, Армијата и локалната самоуправа. Пожарот во Општина Чашка, кај село Владиовци беше локализиран во утринските часови, меѓутоа во 13:30 часот повторно беше активиран. На терен се претставници од ПП единица од Велес и месно население, прецизира Милкова.

Нагласи дека пожарот, кој во попладневните часови избувал во селото Герман во Општина Ранковце, е ставен делумно под контрола и на терен е единица од ПП Ранковце и ШС од Крива Паланка. Во врска со шпекулациите дека таму има жена со деца, рече дека навреме се спасени и не се загрозени.

„ Пожарот во штипските села Драгоево и Селце е ставен под контрола иако на одредени места има појава на чадење. На терен се претставници од ТТППЕ од Штип, МВР, Општина Неготино и други лица од месното население“, рече Милкова и додаде дека другите пожари се делумно локализирани.

Попладнево, истакна, се појавија пожари во велешкото село Којница, Крајница и Извор каде гори нискостеблеста мешана шума. На
лице место се 11 вработени од ШС Бабуна и додаде дека очекува овој пожар да биде локализиран до крајот на денов. Попладнево, посочи, избил пожар и во кочанско Костин Дол, но се држи под контрола и нема опасност да се прошири.

Таа информираше дека е направена смена на меѓународната противпожарна помош од Бугарија, чии екипи беа на терен во Пехчевско. Тие се заменети со нови и веќе се пристигнати три противпожарни возила со неколку пожарникари во земјава кои, како што кажа, во текот на денешниот и утрешниот ден ќе бидат распоредени таму каде што е потребно.

Во моментов, како што нагласи, заседава Главниот штаб и се прави попладневен пресек, а воедно се одредуваат и мерки каде, кога и кои субјекти на кои локалитети да дејствуваат во текот на утрешниот ден.