ФБИ објави доверлив документ за нападите на 11 септември

На годишнината од терористичкиот напад, американското ФБИ објави доверлив документ кој носи нови информации за настанот што го шокираше целиот свет.
Во документот се наведува дека имало логистичка поддршка за двајца киднапери од Саудиска Арабија за време на терористичките напади врз САД во 2011 година. Исто така се наведува дека киднаперите имале контакти со граѓаните на Саудиска Арабија во САД, но не се дадени докази дека високи претставници на саудиската влада учествувале во заговорот, пренесе АП.

На денот на одбележувањето на 20 -годишнината од нападот, ова е првиот документ од истрагата на ФБИ, објавен откако претседателот на САД, Џо Бајден, нареди етикетата доверливо да се отстрани од материјалите кои со години беа недостапни за јавноста.

Документот на 16 страници содржи разговор помеѓу оперативци на ФБИ и човек кој често контактирал со Саудијците во САД, кои им помогнале на првите киднапери да дојдат во Америка, пред нападот.

Минатата недела, Бајден нареди Министерството за правда и другите агенции да ја декласифицираат ревизијата и да ги објават документите што можат да бидат објавени во следните шест месеци.

Тој се соочи со притисок од семејствата на жртвите, кои долго време бараа извештаи, додека тие водеа судска постапка во Њујорк во која тие тврдат дека лидерите на саудиската влада ги поддржале киднаперите.

Редактираниот документ беше објавен во синоќа, неколку часа откако Бајден присуствуваше на комеморативните собири во Њујорк, Пенсилванија и северна Вирџинија.

Роднините на жртвите претходно се спротивставија на присуството на Бајден на комеморацијата, се додека документите се доверливи.

Саудиската влада долго време негираше каква било вмешаност во нападите, а од амбасадата се децидни дека било какви обвинувања дека Саудиска Арабија е соучесник се „категорично невистинити“.

Од 19 киднапери, дури 15 биле државјани на Саудиска Арабија.