пред 4 години Вечерва во Штип почнува 36. издание на фестивалот на забавни мелодии „Макфест“. Фестивалот, кој ќе трае две вечери, 17 и 18 септември, ќе се одржи на отворено, во „Аква бела ресорт“, а поради пандемијата, организаторите, учесниците и публиката ќе мора да се придржуваат до мерките и протоколите за заштита од короната.
Макфест годинава е поделен во две вечери. Првата вечер ќе настапат само млади музичари. Најдобрите пет според гласовите на публиката и жирито ќе пеат и во втората вечер, заедно со 14 познати имиња: Ѓоко Танески, Роберт Билбилов, Александра Јанева, Ај Кју, Лара и други. На „Макфест“ годинава десетти пат ќе се натпреварува и групата „Интервали“.
Во шоу програмата вечерва ќе настапи „Тумбао салса бенд“, а утре публиката ќе ја забавуваат Дац и Александар.
Организатор и покровител на „Макфест“ е Општина Штип. Тие на најдобрите ќе им доделат парични награди: 5.000 евра прва награда, 3.000 евра за второ место и 1.000 евра трета награда. Ќе има и четири парични награди од по 500 евра: за најдобра вокална изведба, за најдобар дебитант, сценски настап и наградата за аранжман ,,Драган Ѓаконовски – Шпато”.
За потсетување, на ланскиот „Макфест“ победи групата „Нокаут“ со „Сакам да живеам“. Прва победничка на реномираниот фестивал, пак, е Хелена Благне, која во 1986 година ја испеа песната „Кога те нема“.
