Јапонија и САД во заедничка операција за одбрана на Тајван од Кина

Јапонските и американските вооружени сили направија план за заедничка операција во врска со можна ескалација на ситуацијата во Тајван.

Ова го објави јапонската агенција „Кјодо“, повикувајќи се на неименувани извори од јапонската влада.

Ваквиот развој на настаните веројатно ќе предизвика реакција кај Кина, која го смета Тајван за одметничка провинција и која треба повторно да се обедини со главната територија на Кина, па дури и со сила доколку е потребно, наведува јапонската новинска агенција.

Според нацрт-планот, американските трупи ќе формираат привремена база за првичниот напад на островите Нанси, синџир што се протега од југозападните јапонски префектури Кагошима и Окинава до Тајван.

Постојат бројни инсталации на американската армија во Јапонија на Окинава.

Американската војска ќе добие поддршка од јапонските одбранбени сили за испраќање војници на островите (Нанси) доколку се случат „непредвидени настани“ во Тајван, додаваат извори.

Меѓутоа, ваквото распоредување би ги направило јапонските острови цел на кинеската армија, што би ги загрозило жителите, предупредува „Кјодо“.

Јапонските одбранбени сили и американската војска имаат околу 40 кандидатски позиции во синџирот за распоредување на Нанси, кој се состои од околу 200 острови со многубројно население.