Министерство за финансии: Јавниот долг се менаџира и се одржува на стибилно ниво

Министерството за финансии го објави податокот за нивото на јавниот и државниот долг заклучно со 31.12.2021 година.

Согласно објавените податоци јавниот долг заклучно со 31.12.2021 година изнесува 60,9 % од БДП.

„Јавниот долг се одржува на стабилно ниво. И во услови на здравствена криза која трае во последните две години, а последниот квартал на 2021 година се соочуваме и со енергетска криза, со политиките и мерките што ги преземаме нивото на јавниот долг на крајот на 2021 година забележа намалување во споредба со нивото на јавниот долг на крајот на 2020 година. На крајот на 2021 година јавниот долг забележа намалување од 0,1 процентен поен во споредба со состојбата на јавниот долг на крајот на 2020 година, додека во третиот квартал имаше намалување од 3,8 процентни поени во однос на претходниот квартал“, истакнуваат од Министерството за финансии.

Додаваат дека остануваат на определбата јавниот долг да биде позициониран под Мастришкиот критериум од 60 % од БДП, така што согласно проекциите со Стратегијата за управување со јавниот долг во 2026 година тој треба да се намали на ниво од 57,7 % од БДП.

Министерството за финансии ги објавува податоците за јавниот долг на квартално ниво, додека за државниот долг на месечно ниво. Според последните податоци државниот долг на 31.12.2021 година е на ниво од 51,9 % од БДП, е наведено во писмената информација.