Во Шпанија брашното и зејтинот се распродадени, во Германија се стравува од недостиг

Поради страв од недостиг во Шпанија, последните денови има голема потрошувачка на одредени прехранбени производи, па полиците со брашно и сончогледово масло се празни во многу супермаркети.

Имено, Шпанија досега увезувала сончогледово масло од Украина, а тој увоз покривал дури 62 отсто од потрошувачката.

„Сончогледовото масло е производ кој сега е тешко да се најде во продавниците. Нарачавме нови количества, но со денови нема испораки“, објави продавачка од супермаркет во Барселона, пренесуваат шпанските медиуми.

Некои супермаркети ја ограничија продажбата на сончогледово масло на пет литри по лице.

Истото важи и за брашното, кое во моментов тешко се наоѓа во продавниците.

Здружението на веледрогерии и супермаркети „Аседас“ пред неколку дена укажа на „невообичаеното однесување на потрошувачите“ во однос на набавката на сончогледово масло и посочи дека е обезбедена набавка на масло за јадење и други намирници во Шпанија.

Според медиумите, проблеми со снабдувањето би можеле да настанат на лето, доколку нема испорака од Украина.

Исто така, поради недостиг на испораки на жита и пченка од Украина во Шпанија, може да има недостиг на сточна храна.

Здружението на индустријата за преработка на масло во Германија предупредува дека може да има недостиг на сончогледово масло за неколку недели.

„Имаме залихи за уште неколку недели“, изјавил за агенцијата ДПА директорот на „Овид“, Герхард Бранкак, пренесуваат печатените медиуми.

Инаку, Германија увезуваше големи количини сончогледово масло од Украина, од кое поради војната повеќе не доаѓаат нови испораки.

„Овид“ укажува дека потрошувачите можат да користат и други масла за јадење, каде што нема да има недостиг.

Според „Овид“, Украина со 51 отсто и Русија со 27 отсто се најважните извозници на сончогледово масло во светот.

Германија покрива 94 отсто од потрошувачката на сончогледово масло со увоз, а само шест отсто е од домашно производство.

Во Австрија нема опасност од недостиг на сончогледово масло, бидејќи домашното земјоделство покрива најголем дел од потрошувачката.