(Видео) Каевски: Во време на криза градоначалниците од ВМРО-ДПМНЕ трошат милиони евра за партиски вработувања

Владата предводена од СДСМ во време на криза презема навремени и ефикасни мерки за помош на граѓаните и стопанството, изјави Дарко Каевски, портпарол и пратеник на СДСМ.

Додаде дека пакетот од 26 антикризни мерки вреден 400 милиони евра веќе дава резултати, цената на горивата постојано се намалува, а со укинувањето на ДДВ за основните производи ги штитиме семејните буџети од нови ценовни шокови.

Но кризата, како што рече, како да не важи за градоначалниците од ВМРО-ДПМНЕ.

„Речиси да нема ден во кој не се појавува нов доказ за расипништво на градоначалниците од редовите на ВМРО-ДПМНЕ. Вчера објавивме дека само четири градоначалници од ВМРО-ДПМНЕ ќе потрошат еден милион евра за партиски вработувања. Градоначалниците на Град Скопје, Гази Баба, Кисела Вода и Ѓорче Петров годинава ќе потрошат скоро еден милион евра за вдомување на партиски кадри на ВМРО-ДПМНЕ. И партизацијата на општините не завршува тука. Градоначалникот на општина Илинден, Александар Георгиевски од ВМРО-ДПМНЕ оваа година ќе потроши четири милиони денари или скоро 70.000 евра за вработување партиски послушници“, нагласи Каевски.

Според него, градоначалниците од ВМРО-ДПМНЕ, како што рече, се најгласни дека општините немаат пари да платат струја и парно а истите со народни пари вдомуваат нивни сопартијци.

„За сето ова време, Христијан Мицкоски кој во јавноста глуми загриженост за економскиот стандард, за ова расипништво молчи, и не ги повикува градоначалниците да престанат со трошењето на парите и да ги пренаменат за потребите на граѓаните. Очигледно е дека ништо не е променето во ВМРО-ДПМНЕ, тоа е нереформирана партија која неодговорно се однесува со парите на граѓаните“, истакна пратеникот на СДСМ.