НАСА наскоро ќе ги објави најновите фотографии од ѕвездите, не очекува историски момент

Остануваат само уште неколку дена до свеченото претставување на првите фотографии направени од новиот вселенски телескоп Џејмс Веб. Како што соопшти НАСА, фотографиите ќе и бидат претставени на јавноста на 12 јули 2022 година, а според изјавите на научниците кои веќе ги виделе фотографиите, станува збор за „историски фотографии“.

„Она што го видов ме трогна како научник, како инженер и како човек“, рече заменик директорот на НАСА, Пем Мелрој во разговор со новинарите.

„Навистина е тешко да не го видите универзумот во ново светло и да не го доживеете тој момент многу лично. Тоа е емотивен момент кога одеднаш разбирате некои од тајните на универзумот“, откри менаџерот на научната мисија на НАСА, Томас Зурбухен.

И првата фотографија, која всушност беше направена за време на калибрацијата на инструментот и тестот за термичка стабилност во средината на мај, покажа дека ни претстои вистинско уживање.

Како што истакнаа од НАСА, фотографијата не е создадена како дел од научна опсервација, туку укажува на моќта на телескопот. Така, ѕвездите можат јасно да се видат со нивните долги, остро дефинирани дифракциони шила.

Фотографијата е направена со 72 експозиции во текот на 32 часа и е една од најдлабоките слики од вселената некогаш направени.

Светлата ѕвезда на десниот раб е 2MASS 16235798+2826079. Има само неколку ѕвезди на оваа слика – се разликуваат по нивните дифракциони шила. Останатите објекти се илјадници бледи галаксии, некои во блискиот универзум, но многу, многу повеќе во далечниот универзум, се вели во соопштението на НАСА.