Џафери на средба со новиот состав на ДКСК: Поддршка во реализација на надлежностите и изградбата на праведно општество за сите

Премиерот Талат Џафери се сретна со новоизбраната претседателка на Државната комисија за спречување на корупција (ДКСК), Татјана Димитровска, и со членовите на новиот состав на Комисијата.

Средбата се реализира на барање на претседателот на Владата, Џафери, и на неа тој истакна дека Комисијата ја има поддршката во реализацијата на законските обврски.

На средбата беа споделени ставови на претставниците на Комисијата за континуиран процес на развој на ДКСК со цел зајакнување на нејзиниот статус, како и за ефикасно спроведување на законските надлежности во делот на спречување корупција.

Заеднички е изразена согласност дека владеењето на правото е еден од клучните приоритети за сите граѓани на Република Северна Македонија и на патот на државата кон Европската Унија и дека во таа насока потребни се заеднички, консолидирани напори од сите страни, правосудната, законодавната и извршната власт, како и широко од општествената јавност за постигнување на очекуваните резултати.

Во однос на актуелната тема за организацијата и спроведувањето на претстојните претседателски и парламентарни избори заеднички се истакна дека е потребен фокус од сите политички субјекти, учесници во изборниот процес кон спроведување транспаренти, фер и демократски избори според европски стандарди и пракси, особено што Република Северна Македонија аспирира кон натамошни исчекори во евроинтеграцискиот процес за скорешно членство во Европската Унија.

Џафери на претседателката на Комисијата, Димитровска, и на присутните претставнички им го честита Меѓународниот ден на жената, 8 Март, истакнувајќи ја важноста на споделената одговорна улога во изградбата праведно и правично општество за сите.

Текстот Џафери на средба со новиот состав на ДКСК: Поддршка во реализација на надлежностите и изградбата на праведно општество за сите е превземен од МАКФАКС.