Три пијалоци кои ќе ви го продолжат животот

Познато е дека водата е неопходна за здравјето, но една голема студија објавена во „Британски журнал за исхрана“ открива дека комбинацијата од кафе, чај и вода е поврзана со најнизок вкупен ризик од смрт.

Истражувачите анализирале податоци од „Биобанк“ од Велика Британија, голема студија базирана на популацијата во која учествувале повеќе од половина милион луѓе. За студијата, тие користеле податоци од повеќе од 182.000 возрасни лица кои пополниле барем еден 24-часовен прашалник за исхраната, со детали за внесот на храна и пијалаци. Тимот ги следел резултатите во текот на 13 години, вклучувајќи ги морталитетот и специфичните причини за смрт.

Оптимален сооднос за долговечност

Анализата покажала дека пиењето седум до осум чаши течност дневно – мешавина од кафе, чај и вода – е поврзано со најниска стапка на смртност. Но, научниците откриле дека специфична комбинација дава најголема корист. Најдобри резултати се постигнати кога луѓето консумирале кафе и чај во сооднос од 2:3, што значи приближно два дела кафе на три дела чај.

Значително намален ризик од голем број болести

Оваа мешавина била поврзана со најнизок ризик од смрт од сите причини, како и од специфични болести како што се рак, срцеви заболувања, респираторни и дигестивни проблеми. Студијата покажала дека држењето до соодносот 2:3 доведува до најзначаен пад на смртноста од респираторни заболувања, намалувајќи го ризикот за дури 72 проценти, во споредба со другите модели на консумација на пијалаци. Исто така, имало драматично намалување од 65 проценти на смртноста од дигестивни заболувања и намален ризик од смрт од кардиоваскуларни заболувања и рак.

Сепак, истражувачите истакнуваат неколку важни забелешки. Студијата била опсервациска и се потпирала на самопријавени податоци, што значи дека не може да докаже причинско-последична врска, туку само поврзаност. Исто така, откриено е дека замената на водата со кафе и чај, со внес од само четири пијалаци дневно, не покажала никаква корист.

Понатаму, кога вкупниот број дневни пијалаци надминувал девет, замената на обичната вода со повеќе кафе или чај била поврзана со потенцијално поголем ризик од кардиоваскуларна смрт. Сепак, научниците се надеваат дека нивното истражување може да послужи како основа за идни студии, кои еден ден ќе обезбедат појасни упатства за оптимална хидратација.