Ракета погоди британски брод во Ормутскиот теснец

Товарен брод беше погоден од ракета во Ормутскиот теснец северно од Оман, објави британската агенција UK Maritime Trade Operations (UKMTO), која ја следи безбедноста на комерцијалниот превоз. Според Sky News, станува збор за британски брод.

Според нивните информации, ракетата го погодила контејнерскиот брод и предизвикала пожар во машинската просторија.

UKMTO соопшти дека екипажот го напуштил бродот, дека сите членови на екипажот биле спасени и дека нема повредени. UKMTO соопшти дека досега нема извештаи за еколошки последици од нападот.

Додаде дека властите го истражуваат инцидентот.

Нападот доаѓа откако претставници на Иранската револуционерна гарда (ИРГК) се заканија во последните денови дека ќе нападнат бродови што се обидуваат да поминат низ Ормускиот теснец.

Висок претставник на ИРГК претходно изјави дека теснецот е затворен и се закани дека иранските сили ќе „запалат бродови“ што ќе се обидат да поминат низ клучната бродска линија. Заканите следеа по нападите на САД и Израел врз цели во Иран и иранската одмазда во регионот.

Ормутскиот теснец е една од најважните бродски линии во светот. Околу една петтина од глобалната нафта поминува низ тесниот воден пат помеѓу Иран и Оман, според американската Администрација за енергетски информации.

Теснецот го поврзува Персискиот Залив со Оманскиот Залив и Индискиот Океан и е клучен за извоз на нафта од земји како што се Саудиска Арабија, Обединетите Арапски Емирати, Кувајт и Ирак. Затоа, секој инцидент во областа веднаш предизвикува загриженост на глобалните енергетски пазари.

 

фото/ЕПА/илустрација

Текстот Ракета погоди британски брод во Ормутскиот теснец е превземен од МАКФАКС.