Мицотакис: Европа не смее да ја повтори миграциската криза од 2015 година

Грчкиот премиер Киријакос Мицотакис пред самитот на Европскиот совет во Брисел изјави дека Европа не смее да дозволи повторување на миграциската криза од 2015 година, предупредувајќи дека конфликтите на Блискиот Исток би можеле да имаат сериозни последици врз безбедноста, енергијата и миграцијата.

Мицотакис рече дека сегашната геополитичка криза ја покажува потребата од ефикасно активирање на клаузулата за заемна помош од Европската Унија, односно членот 42.7, во кој се наведува дека Грција била една од првите што го поддржале Кипар по нападот, а подоцна ќе се приклучат и други европски земји, објави „Катимерини“.

Тој додаде дека на самитот ќе го постави прашањето како сегашната, како што рече, неформална примена на таа клаузула да се претвори во институционално солиден механизам што европските земји би можеле да го користат во случај на напад.

Зборувајќи за економските и енергетските последици од конфликтот, Мицотакис предупреди дека нападите врз нафтената инфраструктура во Заливот би можеле да доведат до нагло зголемување на цените на енергијата и сериозни последици за глобалната економија.

Според него, Европа мора да биде подготвена да ги заштити потрошувачите, особено најранливите граѓани, како и европските компании, пренесува Танјуг.

Тој изјави дека Грција, во рамките на своите фискални можности, ќе преземе мерки за поддршка на граѓаните и економијата, но дека ќе бидат неопходни заеднички европски одговори доколку кризата доведе до долгорочен пораст на цените на бензинот и горивата.

Мицотакис нагласи дека сегашната ситуација не смее да доведе до нова бегалска криза, нагласувајќи дека Европа мора јасно да покаже дека ќе ги заштити своите надворешни граници и дека ќе ги избегне грешките од минатото.

Текстот Мицотакис: Европа не смее да ја повтори миграциската криза од 2015 година е превземен од МАКФАКС.