Иран одбива привремено примирје: „Бараме крај на војната во целиот регион“

Иранскиот заменик министер за надворешни работи, Саид Хатибзаде, изјави дека Техеран одбива какво било привремено примирје и бара сеопфатен крај на војната во целиот регион.

Во разговор со новинарите на маргините на Дипломатскиот форум во Анталија, Хатибзаде нагласи дека секое примирје мора да ги опфати сите жаришта на конфликтот „од Либан до Црвеното Море“, што го опиша како црвена линија за Иран.

„Не прифаќаме никакво привремено примирје“, рече тој, додавајќи дека циклусот на конфликти „мора да заврши тука и еднаш засекогаш“.

Осврнувајќи се на Ормускиот теснец, Хатибзаде истакна дека пловниот пат историски останал отворен, иако се наоѓа во рамките на иранските територијални води.

Тој ги обвини САД и Израел за создавање нестабилност во регионот, додавајќи дека нивните постапки имаат негативно влијание врз глобалната трговија и економијата.

Хатибзаде рече дека Иран останува посветен на одржување на теснецот отворен, но навести дека, со оглед на актуелната состојба, би можеле да се воведат нови аранжмани, вклучително мерки за безбедност, безбеден премин и заштита на животната средина.

Тој додаде дека трајно решение на конфликтот, заедно со напуштање на, како што рече, максималистичките позиции на САД, би обезбедило Ормускиот теснец да остане стабилна рута за глобалната трговија.

Во меѓувреме, началникот на пакистанската армија, Асим Мунир, престојува во Техеран од средата, каде што се сретнал со ирански претставници, меѓу кои и претседателот Масуд Пезешкијан, претседателот на парламентот Мохамад Багер Калибаф и министерот за надворешни работи Абас Арагчи.

Мунир разговарал и со високи ирански воени претставници како дел од посредничките напори насочени кон ставање крај на конфликтот.

Пакистан претходно беше домаќин на разговори откако на 8 април посредуваше во 14-дневно примирје меѓу Вашингтон и Техеран, по американско-израелската воена офанзива врз Иран што започна на 28 февруари.

Светски лидери и високи претставници учествуваат на Дипломатски форум во Анталија во Турција од 17 до 19 април, каде се разговара за глобалните предизвици и регионалните тензии.

Текстот Иран одбива привремено примирје: „Бараме крај на војната во целиот регион“ е превземен од МАКФАКС.