Украина: Бродот со украденото жито нема да го истовари товарот во Израел

Брод што превезува жито за кое Украина тврди дека е украдено од територија окупирана од Русија, нема да го истовари својот товар во Израел, соопшти Украина.

Украинскиот генерален обвинител Руслан Кравченко објави на апликацијата Телеграм дека „Панормитис“ ги напуштил израелските територијални води и влегол во неутрални води по „низа процедурални мерки преземени од Украина“.

Министерството за надворешни работи на Израел соопшти дека украинското барање за правна помош, поднесено доцна во вторникот, „содржи значителни фактички празнини и не вклучува никакви докази“. Менаџерот на бродот што плови под панамско знаме не беше веднаш достапен за коментар.

Зеленски: Ќе дејствуваме систематски против тајната флота за жито
Украинскиот претседател Володимир Зеленски потврди дека министерот за надворешни работи Андриј Сибиха повикал на „посистематска“ кампања против бродовите што транспортираат жито од окупираните територии на земјата. „Ќе дејствуваме систематски против тајната флота за жито, на ист начин како што дејствуваме против тајната флота за нафта“, напиша Зеленски на Телеграм.

Сибиха го пофали пренасочувањето на бродот на платформата X, велејќи дека тоа „покажува дека правните и дипломатските активности на Украина биле ефикасни“. Тој додаде дека Украина ќе продолжи да го следи бродот и да предупредува за какви било операции со него.

„Ова е јасен сигнал до сите други бродови, капетани, оператори, осигурители и влади: не купувајте украдено украинско жито“, нагласи тој.

Текстот Украина: Бродот со украденото жито нема да го истовари товарот во Израел е превземен од МАКФАКС.