По протестите во Белград приведени 47 лица, а повредени се 17 полицајци

Српскиот вицепремиер и министер за внатрешни работи, Ивица Дачиќ, денеска изјави дека во инцидентите по собирот одржан во саботата во Белград биле повредени 17 полициски службеници.

Според него, 47 лица биле приведени во просториите на Министерството за внатрешни работи, а едно од нив поседувало дипломатска легитимација.

Дачиќ изјави дека полицијата не нападнала никого сè додека не биле нападнати полициските службеници и додаде дека ниту еден полицаец не оди на работа со желба да влезе во судир или да биде погоден со камен во главата.

„Тоа не е само пиротехника. Тоа се камења, мотки и стапови. Тоа е напад врз претседателството, врз луѓето собрани во Пионерскиот парк и врз полициските службеници“, изјави Дачиќ во гостување на ТВ Прва.

Тој оцени дека собирот бил класичен предизборен митинг и порача дека на Србија ѝ е потребен граѓански мир, а не граѓанска војна.

Министерот нагласи дека полицијата мора да интервенира кога е нападната и додаде дека собирот бил уредно пријавен, поради што биле преземени сите неопходни мерки за безбедност.

Дачиќ откри дека лицето со дипломатска легитимација е претставник на Светска банка од Бразил.

Тој наведе дека биле поднесени осум кривични и 31 прекршочна пријава и оцени дека е недозволиво што биле повредени 17 полицајци.

Според податоците што ги изнесе, од почетокот на протестите во Србија биле повредени повеќе од 300 полицајци, а од 1 ноември 2024 до 30 април годинава биле одржани вкупно 30.210 јавни собири.

Дачиќ посочи и дека во првите четири месеци од годинава во Србија биле регистрирани 18 убиства, при што, како што рече, сите случаи биле расчистени.

Текстот По протестите во Белград приведени 47 лица, а повредени се 17 полицајци е превземен од МАКФАКС.