По 26 години се враќа култниот Гринч? Џим Кери во преговори за продолжението на божикниот хит

Љубителите на божикните филмови би можеле повторно да го видат Џим Кери во една од неговите најлегендарни улоги. Според најновите информации од Холивуд, во подготовка е продолжение на култниот филм „Како Гринч го украде Божиќ“, а се водат разговори за враќање на славниот актер во улогата која остави неизбришлива трага во филмската историја.

Како што пренесува „Just Jared“, новиот проект се развива во соработка меѓу филмските студија Universal Pictures и Imagine Entertainment, кои стоеја и зад оригиналниот успех од 2000 година.

Рон Хауард повторно зад режисерската палка

Според достапните информации, се очекува режисерот Рон Хауард повторно да го преземе водството на проектот, додека неговиот долгогодишен соработник и продуцент Брајан Грејзер ќе биде дел од продукцискиот тим.

Иако деталите за приказната засега се чуваат во строга тајност, извори блиски до продукцијата тврдат дека студиото сака да ја продолжи приказната за омилениот зелен мрчатор кој со текот на времето прерасна во една од најпрепознатливите божикни филмски икони.

Филм кој стана празнична класика

Оригиналниот филм „How the Grinch Stole Christmas“, базиран на делото на легендарниот автор д-р Сјус, беше вистински хит кога се појави во кината во 2000 година.

Филмот освои Оскар за најдобра шминка, а заработи повеќе од 345 милиони долари ширум светот, од кои околу 260 милиони долари само во Северна Америка.

Во изминатите две децении, филмот прерасна во вистинска празнична класика. Според податоците на Nielsen, „Гринч“ и понатаму се наоѓа меѓу десетте најгледани божикни филмови во последните пет години.

Приказната го следи Гринч, осамен и намуртен жител на планината над Вовил, кој одлучува да им го украде Божиќ на веселите жители на градот. Но, низ серија настани открива дека празничниот дух не се состои од подароци и украси, туку од љубов, заедништво и добрина.

Искусен тим зад новото сценарио

Продолжението ќе го пишува искусен тим составен од Алек Берг, Џеф Шафер и Дејвид Мандел.

Тројцата сценаристи веќе имаат искуство со адаптации на делата на д-р Сјус, бидејќи работеа и на сценариото за филмот „Мачката со шапка“ од 2003 година, во кој главната улога ја толкуваше Мајк Мајерс.

Целиот проект ќе биде надгледуван од Сузан Брант, извршна директорка на Dr. Seuss Enterprises, која ќе се грижи новото продолжение да остане верно на духот на оригиналното дело.

Од негирање до можен камбек

Интересно е што пред само неколку години изгледаше дека ваков проект никогаш нема да се реализира.

Во 2023 година, публицистот на Џим Кери јавно ги демантираше гласините за продолжение на „Гринч“, изјавувајќи дека нема никаква вистина во шпекулациите дека актерот ќе ја повтори својата улога.

Но, според најновите информации, ситуацијата очигледно се променила. Холивудските студија повторно започнале разговори за проектот, а можноста Кери да се врати како Гринч сега изгледа пореална од кога било.

Доколку договорот биде финализиран, тоа би значело враќање на актерот во една од неговите најомилени и најпрепознатливи улоги, која и денес останува симбол на божикната филмска магија.

Фановите ширум светот со нетрпение ги очекуваат новите детали, надевајќи се дека Гринч повторно ќе се врати на големото платно и уште еднаш ќе го освои срцето на публиката.