Иран: Транзитот низ Ормускиот теснец е можен само со договор

Морнарицата на Корпусот на Исламската револуционерна гарда (ИРГЦ) денес предупреди дека безбедното минување низ Ормускиот теснец е можно само преку рутите одредени од иранските власти, наведувајќи дека секое движење надвор од официјално утврдените коридори е „забрането и опасно“.

Во соопштението на ИРГЦ се наведува дека алтернативните транзитни рути се „неприфатливи и целосно опасни“ и дека секој сообраќај надвор од одобрените рути ќе биде предмет на следење и реакција, објави порталот „Прес ТВ“.

Иранските власти нагласија дека координацијата со морнарицата на ИРГЦ е „задолжителна“ за сите бродови што минуваат низ тој стратешки воден пат.

Предупредувањето следеше неколку дена по изјавата на претседателот на иранскиот парламент, Мохамед Багер Калибаф, кој рече дека управувањето со Ормускиот теснец нема да се врати во состојбата што постоеше пред 28 февруари, кога, според тврдењата на Техеран, Соединетите Американски Држави и Израел започнаа нов бран воени активности против Исламската Република.

Иран претходно објави дека го ограничил преминот низ теснецот за земјите што ги смета за непријателски настроени, како одговор на она што го нарекува американски мерки против иранските пристаништа и бродови.

После тоа, Техеран почна да воведува построга контрола на морскиот сообраќај низ теснецот.

Според иранските претставници, во меѓувреме, Техеран и Вашингтон постигнаа меморандум за разбирање насочен кон намалување на тензиите и нормализирање на морскиот сообраќај, кој потоа го потпишаа претседателите на двете земји.

Меморандумот предвидува Иран да обезбеди безбеден премин за комерцијални бродови помеѓу Персискиот Залив и Оманскиот Проток во период од 60 дена без наплата на такси.

Текстот Иран: Транзитот низ Ормускиот теснец е можен само со договор е превземен од МАКФАКС.