Трамп објави бизарни слики направени со вештачка интелигенција од нападите врз Иран

Американскиот претседател, Доналд Трамп, продолжи да му се заканува на Иран вчера, и покрај привременото прекинување на непријателствата. На својата социјална мрежа Truth Social, тој објави серија слики генерирани од вештачка интелигенција кои го покажуваат уништувањето и запленувањето на ирански бродови и енергетска инфраструктура, пишува The Times of Israel.

На најавите им претходеа два мирни дена на Блискиот Исток, по 13 дена интензивни воздушни напади врз Иран и одмазднички ирански напади. Пентагон ја прекина кампањата на бомбардирање во петокот навечер, а во текот на викендот не беа пријавени нови американски напади.

И Иран ги запре нападите врз соседните земји со американски бази, со што одговори на американските бомбардирања. Техеран изјави дека ќе се воздржи од напади сè додека САД се воздржат.

Според достапните информации, борбите биле запрени бидејќи советниците го предупредиле Трамп дека му снемуваат цели за напади и изразиле загриженост за намалувањето на залихите на оружје на САД. Сепак, Трамп ги отфрли ваквите обвинувања. Тој за „Волстрит џурнал“ изјави: „САД имаат многу повеќе муниција од кој било друг во светот, и многу повеќе отколку што ни треба“.

Американските воени претставници предупредија во последните денови дека двонеделната бомбардирачка кампања ги исцрпила повеќето од однапред одредените цели.

Трамп синоќа објави серија слики генерирани од вештачка интелигенција кои покажуваат уништување и запленување на ирански средства.

На една слика се прикажани воени авиони како бомбардираат нафтен објект, со натпис „НАПАД ВРЗ ХАРГ“. Тоа е иранскиот остров Харг, клучен терминал за извоз на сурова нафта. Потоа објави неколку слики со натпис „Ова е нашиот танкер сега!“, на кои американскиот претседател држи американско знаме на брод што личи на ирански.

Една верзија прикажува американски војници, додека друга прикажува војници со фигури што личат на ирански верски водачи. Тој ја заврши серијата со слика од ирански брод што експлодира, со натпис „НЕМА ПОВЕЌЕ МОТОРИ“.

 

Во меѓувреме, врховниот лидер на Иран, Моџтаба Хамнеи, во неделата објави писмена изјава во која ветува дека неговата земја ќе продолжи да ја поддржува терористичката група Хезболах во Либан.

„Нема друг начин освен џихад и отпор“, се вели во изјавата упатена до лидерот на Хезболах, Наим Касем. Изјавата ја објави Хамнеи на Инстаграм, а ја емитуваше и опозицискиот медиум Иран Интернешнл на англиски јазик.

Хамнеи ја опиша борбата на Хезболах против Израел како „инспиративна порака“ и вети дека нивните постапки ќе донесат „божествена победа“. Тој рече дека секое ново примирје со САД мора да вклучува „целосен и безусловен“ крај на израелските напади врз либанска територија.

Текстот Трамп објави бизарни слики направени со вештачка интелигенција од нападите врз Иран е превземен од МАКФАКС.