(ВИДЕО) Откриен нов предатор во најмрачните длабочини на Тихиот Океан: Изгледа како суштество од научнофантастичен филм

Во речиси целосно неистражените длабочини на Тихиот Океан, каде што не продира ниту еден зрак сончева светлина, научниците открија досега непознат вид предатор кој би можел значително да ги прошири сознанијата за животот во најекстремните услови на Земјата. Станува збор за мал, но исклучително ефикасен грабливец кој живее на длабочина каде што притисокот на водата е речиси 800 пати поголем од атмосферскиот притисок на површината.

Откритието е резултат на истражувањата во Атакамскиот Ров, познат и како Перуанско-чилеански Ров, еден од најдлабоките океански ровови во светот. Тој се протега околу 6.000 километри долж западниот брег на Јужна Америка, а кај северниот дел на Чиле достигнува длабочина поголема од 7.900 метри.

Иако не е најдлабоката точка на Земјата – таа титула и понатаму ја држи Маријанскиот Ров со локацијата „Челинџер дип“ – Атакамскиот Ров претставува уникатен и изолиран екосистем, оддалечен илјадници километри од другите длабокоморски ровови.

Нова врста и целосно нов род

Новооткриениот организам го доби научното име „Dulcibella camanchaca“, а истражувачите сметаат дека не станува збор само за нов вид, туку и за целосно нов род, што му дава особено значење на ова откритие.

Примероците биле собрани за време на научната експедиција во 2023 година, организирана од Институтот „Милениум“ за океанографија при Универзитетот во Консепсион, Чиле. Истражувањето било спроведено од научноистражувачкиот брод „Abate Molina“, по што примероците биле извлечени од океанот, замрзнати и детално анализирани во лабораторија.

Најголем дел од анализите биле направени врз женка долга околу четири сантиметри, а токму ДНК-анализата покажала дека генетски значително се разликува од сите досега познати сродни видови.

Резултатите од истражувањето се објавени во престижното научно списание „Systematics and Biodiversity“.

Анатомијата открива дека станува збор за вистински ловец

Иако научниците сè уште не го набљудувале директно начинот на кој „Dulcibella camanchaca“ лови, неговата градба јасно укажува дека станува збор за активен предатор.

За разлика од многу други длабокоморски ракчиња кои главно се хранат со остатоци од угинати животни, овој вид има силни усни органи приспособени за кинење плен, како и големи предни екстремитети што функционираат како клешти и му овозможуваат да фаќа живи организми.

Таквите анатомски карактеристики се ретки кај сродните видови и укажуваат на сосема поинаков начин на живот во однос на повеќето жители на најголемите океански длабочини.

Живее таму каде што повеќето организми не би преживеале

Овој необичен предатор е пронајден на длабочина од околу 7.900 метри, каде што притисокот достигнува околу 790 атмосфери – речиси 790 пати повеќе отколку на морското ниво.

Во такви услови најголемиот дел од познатите организми не би можеле да преживеат, но овој мал рак без проблеми плива, лови и редовно го менува својот оклоп додека расте.

Научниците сè уште се обидуваат да откријат кои биолошки механизми му овозможуваат да опстане во толку сурова средина.

Атакамскиот Ров крие уште многу непознати видови

Истражувачите веруваат дека ова е само почеток на нови големи откритија во еден од најмалку истражените делови на нашата планета.

На почетокот на 2026 година, заедничка кинеско-чилеанска експедиција повторно го истражуваше Атакамскиот Ров со подморницата „Fendouzhe“, специјално конструирана за нуркање до најголемите длабочини во светските океани.

Во текот на повеќе од 60 нуркања биле собрани огромен број примероци, вклучувајќи седименти, еколошка ДНК и бројни видеоснимки од морското дно.

Универзитетот во Консепсион соопшти дека станува збор за најголемата биолошка колекција досега собрана од Атакамскиот Ров.

Меѓу првите резултати од експедицијата веќе се регистрирани необични проѕирни риби, медузи, морски краставици и повеќе организми за кои постои сомнеж дека претставуваат целосно нови видови кои науката сè уште не ги опишала.

Откриен и најдлабокиот хемосинтетички екосистем на јужната хемисфера

Истражувачите од Кинеската академија на науките објавија и уште едно значајно откритие. За време на истражувањата го идентификувале најдлабокиот познат хемосинтетички екосистем на јужната хемисфера.

За разлика од повеќето живи организми на Земјата, кои зависат од сончевата светлина, организмите во овој екосистем ја добиваат потребната енергија од хемиските соединенија што излегуваат од морското дно.

Ова дополнително потврдува дека најдлабоките океански ровови претставуваат уникатни екосистеми кои сè уште кријат многу непознати форми на живот.

Најголемите тајни на планетата можеби се кријат токму на дното на океанот

Научниците нагласуваат дека најдлабоките океански ровови остануваат меѓу најмалку истражените места на Земјата и дека речиси сигурно кријат голем број организми кои допрва ќе бидат откриени.

Откривањето на „Dulcibella camanchaca“ покажува дека дури и во целосен мрак, под притисок од речиси 800 атмосфери, природата успева да создаде сложени организми совршено приспособени за живот и лов, отворајќи нови прашања за границите на животот на нашата планета.