Мадуро бара од судот во Њујорк да го отфрли обвинението

Сменетиот од власт, венецуелски претседател Николас Мадуро вчера побара од американски судија да ги отфрли обвиненијата за кривичното дело трговија со дрога против него, тврдејќи дека тој треба да биде имун од гонење како шеф на суверена држава. Обвиненијата, поднесени во федералниот суд на Менхетен, беа основа за нападот на американската војска врз Каракас и апсењето на Мадуро на 3 јануари.

Венецуелскиот лидер, кој е држен во федерален затвор во Бруклин од неговото апсење, се изјасни за невин, а неговото судење треба да започне на 1 јуни 2027 година, доколку неговиот обид за отфрлање на обвиненијата е неуспешен. Принципот дека актуелните шефови на држави се имуни од гонење во странство е долгогодишен принцип на меѓународното право, кој се смета за фундаментален за дипломатијата, но американските судови не се спремни да го применуваат меѓународното право во кривичните случаи.

Адвокатот на Мадуро, Бери Полак, се повика на имунитет во своето барање за отфрлање на обвиненијата. Хелерштајн му даде рок на Полак до вчера да го поднесе своето барање. „Ова невидено гонење го нарушува апсолутниот имунитет од кривична надлежност на кој шефовите на држави и странските функционери кои дејствуваат во нивните службени капацитети имаат право со векови“, напиша Полак.

Полак, исто така, напиша дека Мадуро бил лажно обвинет и „жестоко ги негира обвиненијата“. Адвокатите за Ројтерс изјавија дека Мадуро се соочува со тешка битка. Вашингтон не го признава Мадуро за претседател на Венецуела од 2019 година, а судовите обично ги следат одлуките на претседателот на САД и неговиот кабинет во споровите околу тоа кој е признат за лидер на странска земја.

Соединетите Американски Држави престанаа да го признаваат Мадуро во 2019 година, кога тој беше инаугуриран по изборите во 2018 година за кои САД рекоа дека биле наместени. САД, исто така, го нарекоа неговиот реизбор во 2024 година измама. Мадуро вели дека двата избори биле фер и долго време го обвинува Вашингтон дека бара негово соборување за да ја преземе контролата врз нафтеното богатство на јужноамериканската земја.

Полак напиша дека проценката на Вашингтон дека Мадуро нема легитимитет е ирелевантна. Од апсењето на Мадуро, неговата потпретседателка и социјалистичка сојузничка Делси Родригез ја предводи Венецуела и ја засилува соработката со администрацијата на Трамп.

Текстот Мадуро бара од судот во Њујорк да го отфрли обвинението е превземен од МАКФАКС.