Путин: Светот е на одлучувачка пресвртница, Истокот и Западот ќе мора да се договорат за нов поредок

Претседателот на Русија, Владимир Путин, изјави дека светот достигнал одлучувачка пресвртница во својот развој, нагласувајќи дека промените што се случуваат не се ограничени само на политиката.

„Политиката, како и секогаш, произлегува од длабоки промени“, рече Путин на пленарната сесија на Меѓународниот дискусионен клуб „Валдај“.

Според него, човештвото чувствува големи промени, но сè уште не го разбрало целосно вистинскиот обем на предизвиците што ги носат.

„Ова е почеток на сосема нова реалност, во која заканите и опасностите се неразделно испреплетени со можностите. Не станува збор само за промена на рамнотежата на моќта меѓу земјите, туку за фактот дека овие промени влијаат на самата биолошка и морална суштина на човечките суштества“, истакна рускиот претседател.

Путин процени дека порано или подоцна сите страни на светот – Исток и Запад, Север и Југ – ќе мора да се договорат за принципите на новиот светски поредок.

„Убеден сум дека интелектуалниот капитал и искуството од директен дијалог заснован на доверба, што ги стекна клубот „Валдај“, сигурно ќе бидат барани – во време кога сите ние, Исток и Запад, Север и Југ, порано или подоцна ќе мора да се согласиме за принципите на формирање нов светски поредок, способен да обезбеди напредок и развој на човештвото во наредните децении“, нагласи Путин.

Тој предупреди дека е потребно да се избегнат, како што рече, најкатастрофалните сценарија.

„Одговорноста на светот за заедничката иднина не е апстрактен слоган, туку збир на практични дејствија насочени кон спречување на човештвото да се лизне на работ на опстанокот и да се избегне непоправливото“, рече рускиот претседател.

Путин оцени дека, без оглед на сценариото што ќе се одвива на глобално ниво во наредните години, продолжувањето на меѓународните конфликти е за жал многу веројатно.

„Какво и да е сценариото што се одвива на глобално ниво во наредните години, продолжувањето на меѓународните конфликти е, за жал, многу веројатно“, рече тој.

Според него, загрижувачките трендови на меѓународната сцена поттикнуваат размислување за тоа како да се зачува глобалниот мир и безбедност.

„Загрижувачките трендови на кои сме сведоци на меѓународната сцена нè принудуваат да размислуваме, пред сè, не за тоа како да ја организираме глобалната соработка помудро, поефикасно и пофер во наредниот период, иако сето ова е, секако, исклучително важно, туку за тоа како да го зачуваме глобалниот мир и безбедност токму сега, во време кога многу воспоставени правни норми се отфрлени, а нови сè уште не се воспоставени“, рече Путин.

Рускиот претседател изјави дека новиот светски поредок треба да овозможи напредок и развој на човештвото во наредните децении, но истакна дека моменталниот приоритет се многу поитни и сериозни предизвици со кои се соочува меѓународната заедница.

Текстот Путин: Светот е на одлучувачка пресвртница, Истокот и Западот ќе мора да се договорат за нов поредок е превземен од МАКФАКС.