Украдените лични и финансиски податоци можат да бидат злоупотребени за преземање на сметки и кражба на идентитет.


Вештачката интелигенција е сè почеста алатка на која луѓето се обраќаат за помош при управувањето со своите лични финансии. Од буџетирање на домаќинството и анализа на трошоците до совети за штедење, инвестирање и отплата на долгови, чет-ботовите како ChatGPT станаа практични финансиски асистенти за многумина. Сепак, експертите предупредуваат дека постои граница што никогаш не треба да се премине. Одредени лични и финансиски информации не треба да се споделуваат со вештачката интелигенција, бидејќи нивното откривање може да го зголеми ризикот од измама и кражба на идентитет.

Иако користењето на вештачката интелигенција за финансиско планирање може да изгледа корисно на прв поглед, експертите предупредуваат дека мора да се биде особено претпазлив во однос на податоците што би можеле да откријат нечиј идентитет или да овозможат пристап до банкарски сметки. Ова важи за големи јазични модели како што се ChatGPT, Claude, Grok и Gemini. Со внесување чувствителни информации или поставување фотографии од финансиски документи, корисниците можат да ги изложат своите лични податоци на потенцијални безбедносни ризици.

Какви податоци никогаш не треба да споделувате со вештачката интелигенција?

„Им препорачувам на клиентите никогаш да не споделуваат ништо што би можело да ги идентификува или да им овозможи пристап до сметките“, изјави за HuffPost Нава Кнафо, менаџер за ризик во National Bank Financial.

„Откако тие информации ќе бидат внесени во четбот, тие ја губат контролата врз тоа каде одат“, предупреди таа.

Особено е важно да се избегнува споделување на следниве видови информации:

  • Броеви на банкарски сметки
  • Броеви на кредитни и дебитни картички
  • Лозинки и ПИН-кодови за пристап до банкарски сметки
  • Национален број на лична карта или број на социјално осигурување
  • Целосни банкарски извештаи
  • Даночни пријави
  • Документи поврзани со кредити

Проблемот е што ваквите документи често содржат повеќе чувствителни информации на едно место, вклучувајќи целосни имиња, адреси, податоци за работодавачот и информации за банкарската сметка. Споделувањето на овие документи со четботови може да создаде непотребни ризици за приватноста и безбедноста на корисниците.

Кнафо објаснува дека, во зависност од поставките на специфичната платформа, разговорите со вештачка интелигенција може да се складираат, прегледуваат или користат за подобрување на моделите. Понатаму, таа предупредува дека ниеден дигитален систем не е целосно имун на нарушувања на безбедноста. „Четботовите исто така не се обврзани со обврските за доверливост и безбедност што важат за банките и лиценцираните советници“, забележа таа.

Украдените лични и финансиски податоци можат да бидат злоупотребени за преземање на сметки и кражба на идентитет. Поради оваа причина, експертите советуваат корисниците да не споделуваат информации што би можеле да му овозможат на некој друг пристап до нивните финансии. Гуру Сахајпал, раководител на секторот за финансиски услуги и финансиски технологии во компанијата Cognizant, го дели ова мислење.

„Општо земено, нема причина AI алатката да има потреба од такви информации, а нивното непотребно споделување може да создаде ризици за приватноста и безбедноста – вклучително и неовластен пристап до сметки или злоупотреба на лични и финансиски податоци“, изјави тој за ХафПост.

Тој додаде дека како што вештачката интелигенција станува сè позастапена во финансиските услуги, потрошувачите мора да бидат свесни за тоа какви информации споделуваат, зошто ги споделуваат и како тие би можеле да се користат надвор од нивната наменета намена.