СДСМ: За време на владеењето на ВМРО-ДПМНЕ горивата беа со рекордно високи цени

Опозициската ВМРО-ДПМНЕ продолжува да ја манипулира јавноста во врска со воведувањето на еколошка такса за горивата со намера да создаде страв кај граѓаните и да ја поттикне нивната недоверба во институциите, реагираат преку соопштение од владејачката СДСМ, на одржаната прес конференција од страна на Трајко Славески член на ИК на ВМРО-ДПМНЕ.

Од таму додаваат дека партијата во чие време како што велат, граѓаните плаќаа гориво по рекордно високи цени, а државата се гушеше во загаденост, денес нема право да зборува ниту за цената на бензините, ниту за екологијата.

Сега, посочуваат од СДСМ и со дополнителната еколошка такса од 3,5 денари нафтата ќе биде најевтина во регионот.

Според СДСМ, со новата мерка нема да се зголеми инфлацијата, туку ќе се зголемат буџетските приходи и еколошкиот фонд со што ќе се промовира користењето на обновливите извори на енергија.

„Целта на воведувањето на еколошката такса е доследна примена на начелото „загадувачот плаќа“ и прибирање на потребните средства за преземање на мерки и активности за заштита и унапредување на животната средина. Борбата против загадувањето предизвикува финансиски импликации, а еколошките такси ќе бидат наменети исклучиво за зелени инвестиции и зелени работни места. Нема паралелна реалност. Реалноста е само една, а тоа е дека ВМРО-ДПМНЕ блокира и опструира се што е во интерес на граѓаните и не може да се ослободи од режимската, деструктивна матрица“, стои во соопштението од СДСМ.