Левица: Во ек на хаосот со АЛТА банка, Владата на ДПМНЕ го намалува буџетот за финансиско разузнавање за 1,7 милиони денари

Случајот со АЛТА банка – Битола отвори сериозни прашања за ефикасноста на финансискиот надзор, навременото препознавање на ризиците и заштитата на граѓанските депозити. Додека штедачите се соочуваат со драстично ограничен пристап до сопствените средства, на површина излегува уште еден загрижувачки податок од последниот ребаланс на Буџетот, велат од Левица.

Имено,  како што се додава, Владата на ДПМНЕ ги намалува средствата за Управата за финансиско разузнавање од 55,4 на 53,7 милиони денари, односно за 1,7 милиони денари.

„Управата за финансиско разузнавање има важна улога во откривањето сомнителни финансиски трансакции, следењето на потенцијалните злоупотреби и размената на информации со надлежните институции. Во држава во која корупцијата со децении ги поткопува институциите, а сомнежите за перење пари, незаконско стекнување имот и злоупотреба на јавни средства постојано ја оптоваруваат јавноста, финансиското разузнавање претставува еден од клучните механизми за откривање на тековите на сомнителниот капитал. Особено во Македонија, каде што политичката и економската моќ неретко се испреплетуваат, неопходни се институции способни да ги следат финансиските траги, препознаваат сложените шеми на злоупотреба и да обезбедуваат информации за нивно навремено истражување. Токму затоа, кратењето на средствата за оваа институција отвора сериозно прашање за приоритетите на Владата во борбата против криминалот.

Важно да се утврди дали во случајот со АЛТА постоеле претходни предупредувања, сомнителни трансакции или информации што требало да предизвикаат институционална реакција. Особено што српската АЛТА банка ја презеде битолската банка со согласност од македонските надлежни институции, а нешто повеќе од една година подоцна остана без дозвола за работа во Србија. Оваа временска линија бара детална проверка на процените врз основа на кои било одобрено преземањето, како и на информациите со кои располагале регулаторите во меѓувреме. Јавноста заслужува конкретни одговори за тоа како биле следени ризиците, наместо целата неизвесност да се префрли врз граѓаните.

Левица бара целосна отчетност за преземањето и надзорот над АЛТА банка, јасно образложение за ограничувањата на депозитите и објаснување од Владата за намалувањето на средствата за финансиско разузнавање. Граѓаните имаат право да знаат како се штитат нивните пари, какви ризици биле идентификувани и какви мерки ќе се преземат во иднина“, се додава во соопштението.

Текстот Левица: Во ек на хаосот со АЛТА банка, Владата на ДПМНЕ го намалува буџетот за финансиско разузнавање за 1,7 милиони денари е превземен од МАКФАКС.