Димитров: Сè потешко станува да им зборувам на граѓаните за европска интеграција

Вицепремиерот задолжен за европски прашања, Никола Димитров, денеска на Скопскиот економски форум имаше обраќање на панелот насловен „Испорачување на ветувањето од ЕУ: Да се види за да се верува“, заедно со амбасадорот на Европската Унија, Дејвид Гир и Гашпар Довжен, државен секретар на словенечкото МНР.

Димитров нагласи дека европската визија за Западен Балкан и процесот на проширување мора да биде зајакната со политичка одговорност и одлучност, во име на, како што рече, заедничките цели и вредности, како и во име на дадените ветувања.

„Сè потешко стува за мене да разговарам со нашите граѓани и да го одржам наративот дека европската интеграција е навистина можна. Навистина ни треба придвижување. Овој регион е опкружен со земји-членки. Економски, политички и историски, културолошки, припаѓаме на Европа и навистина е важно да видиме конкретни одлуки и движења за поддршка и за исполнување на ветувањето дадено во Солун. Ние немаме алтернатива, освен да станеме функционална европска демократија, што доаѓа заедно со економски просперитет“, посочи вицепремиерот.

Сепак, Димитров и натаму е оптимист дека можно е европско решение со Бугарија, кое е во согласност со европските вредности.

Тој се заблагодари на словенечкото претседателство за нивните планови во однос на Западен Балкан, но и на напорите на португалското претседателство за почеток на пристапни преговори со Северна Македонија.

„Сметам дека треба да ги здружиме силите, да размислуваме стратешки. Имаме визија, а тоа е добра почетна позиција за конвергенција и премостување на разликите меѓу Балканот и Европската Унија во економска смисла. Сите знаеме дека влогот е огромен и сметам дека имаме можност за успех, што треба да го искористиме во месеците што доаѓаат. Се разбира, проевропските сили ќе станат послаби ако не успее европската визија во овој регион и тоа не треба да го потценуваме“, дециден е вицепремиерот.

Словенечкиот државен секретар Довжан потенцираше дека вклучувањето на Западниот Балкан во ЕУ не е само од интерес на земјите од регионот, туку и геостратешка потреба на Унијата и нагласи дека проширувањето на ЕУ ќе биде еден од приоритетите на словенечкото претседателство.

Амбасадорот Гир ја повтори позицијата на Европската комисија дека почетокот на преговори со Северна Македонија и Албанија останува приоритетно прашање и дека процесот на проширување мора одлучно да се движи напред.