АВМУ: Пандемијата на Ковид-19 негативно се одразува врз економското работење на медиумите

Под покровителство на Обединетите нации, денеска се одбележува Светскиот ден на слобода на печатот, чија тема „Информацијата како јавно добро“ има за цел да ја афирмира важноста на ова прашање и да укаже на неопходноста од зајакнување на новинарството.

Годинава, како клучни се издвоени три поттеми: обезбедување економска одржливост на медиумите, креирање механизми за обезбедување транспарентност на интернет-компаниите и унапредување на капацитетите за медиумска и информативна писменост кои им овозможуваат на граѓаните да го препознаат, вреднуваат и заштитат новинарството како витален дел од информацијата како јавно добро.

Од Агенцијата за аудио и аудиовизуелни медиумски услуги наведуваат дека актуелната пандемија на Ковид-19 негативно се одразува врз економското работење на медиумите и медиумскиот плурализам и придонесува за глобална појава на „инфодемија, поради што сега повеќе од било кога е потребно да се одржи и заштити независноста на медиумите и да се промовира известување базирано на факти кое е клучно за јавното добро на глобално ниво.

Истовремено, велат од АВМУ, денешниот ден, 3 мај, е потсетник за владите дека мора да се придржуваат кон преземените обврски за заштита на независноста на медиумите од напади, почитување на фундаменталните принципи на слобода на медиумите и на правото на слободата на изразување, содржано во Европската конвенција за човекови права, на чие почитување е обврзана и нашата држава.