Дел од пратениците се злоупотребени, вели координаторот на СДСМ за новото мнозинство што го најави Мицкоски

Координаторот на пратеничката група на СДСМ, Јован Митрески вели дека биле злоупотребени дел од пратениците кои се потпишале за гласање на доверба на владата. Според информациите на координаторот на СДСМ, овие пратеници не биле точно информирани со кого, односно со кои други партии од парламентот имаат заедничка цел.

„Како координатор сум во постојана комуникација со сите пратеници од пратеничката група, но и со пратеници кои делуваат надвор од неа, а се во поддршка на прогресивните политики, на заедничките политики кои носат напредок. Сите, буквално сите даваат безрезервна поддршка и најостро ги демантираат конструкциите кои ВМРО-ДПМНЕ ги прави со единствена цел да изврши притисок и да создава нереална еуфорија во јавноста. Од друга страна, добивам информации дека дел од вчерапотпишаните пратеници за гласање на наводна доверба на владата се злоупотребени и не се точно информирани со кого, односно со кои други партии од парламентот имаат т.н. заедничка цел. Со еден збор се злоупотребени“, напиша Митрески на социјалните мрежи.

Тој нагласи дека СДСМ остануваат отворени и ги повика на соработка и одговорно застанување на страната на демократската опција сите прогресивни демократски сили и сите пратеници кои се за европска иднина на нашата држава, за правда и економскиот напредок.