Камчев не сакаше да сведочи за случајот „Меѓународен сојуз“

Бизнисменот Орце Камчев одби да биде сведок во случајот „Меѓународен сојуз“, бидејќи бил нарушен неговиот кредибилитет. На ваквото барање се спротистави обвинителката Ивана Трајчева и побара да биде сослушан, а судијката Софче Гавриловс-Ефремова прифати.

„Барам да бидам изземен од својството на сведок затоа што во околности каде во државава се крши законот грубо од страна на Обвинителството и судот, мојот кредибилитет е нарушен и нема да бидам во корист на Обвинителството”, рече Камчев.

Сепак, за Трајчева притворот на Камчев нема поврзаност со овој случај.

„Денес повиканиот сведок е повикан во врска со предметното обвинение. Повикан е на околности колку е запознаен и дали е запознаен во врска со проектите на Меѓународниот сојуз. Притворот за друг предмет нема никаква врска со исказот и кредибилитетот. Таа постапка е различна од оваа денеска. Доколку смета дека таму му се прекршени права, треба тоа да го каже таму”, рече Ивана Трајчева.

Судијката ѝ кажа на обвинителката да го испраша сведокот.