На трибината требаше да се појави Мицкоски и да каже што разговарал со Кирил Петков, велат од СДСМ

Наместо лажни конструкции и рециклирани обвининувањa, јавноста денеска очекуваше дека на трибината на ВМРО-ДПМНЕ ќе се појавеше Христијан Мицкоски и ќе одговори на прашањата за кои молчи со денови, реагира СДСМ по дискусијата што денеска се одржа во просториите на опозициската партија, а беше насловена: Заштита на националните и државни интереси, наместо пазар дипломатија.

„Дали Мицкоски на бугарскиот премиер Кирил Петков му ги постави прашањата кои ги нарачуваше од медиумите? Што кријат Мицкоски и ВМРО-ДПМНЕ од средбата со Петков? За што се зборувале на таа средба? Граѓаните видоа и претходно на средба на Мицкоски со Бојко Борисов дека тој ги менува ставовите кога се среќава со официјални претставници.Дали така било и на средбата со Петков, треба да каже самиот Мицкоски“, велат од СДСМ.

Во соопштението што минатата недла ВМРО-ДПМНЕ го испрати до медиумите, а се однесуваше на средбата на Мицкоски и Петков беше наведено дека двајцата лидери зборувале за актуелните состојби, градењето на доверба и заедничката соработка во полето на инвестициите, образованието, науката. „Мицкоски се задржа на истите позиции кои се и претходно јавно познати“, беше наведено во кусото соопштение за средбата со Петков, без образложение за кои позиции станува збор.